By (ខេត្តបាត់ដំបង)៖ រមណីយដ្ឋានភ្នំសំពៅ កំពុងក្លាយជាទីកន្លែងកម្សាន្តដ៏ពេញនិយម ដែលទាក់ទាញចិត្តភ្ញៀវទេសចរជាតិ និងអន្តរជាតិ។ ជាពិសេសចម្លាក់បដិមា និងសត្វប្រចៀវរាប់លានក្បាល ជាគោលដៅទេសចរដ៏សំខាន់មួយ។ 
ជារៀងរាល់ថ្ងៃ ចាប់ពីម៉ោង ៤ល្ងាចទៅ មានមនុស្សជាច្រើនទៅកម្សាន្តនៅទីនោះ។ ដោយមានការរៀបចំទីតាំងស្អាត និងងាយស្រួលសម្រាប់ដើរទស្សនា ទេសចរភាគច្រើនមកកម្សាន្តបែបលក្ខណៈគ្រួសារ។ 
ចំពោះវេលាម៉ោង ៤ល្ងាច ងាយស្រួលដល់ទេសចរទៅទស្សនាចម្លាក់បដិមា ដែលបានដាប់ឆ្លាក់ជាប់ជាមួយជញ្ជាំងភ្នំសំពៅ។ បន្ទាប់ពីទស្សនាបដិមារួច ទេសចរក៏បន្តទស្សនាសត្វប្រចៀវ។ 
វេលាថ្មើរនោះ សត្វប្រចៀវហើរចេញពីរូងភ្នំសំពៅ ឆ្ពោះទៅកាន់ព្រៃឆ្ងាយៗ ដើម្បីរកចំណី។ សត្វប្រចៀវរាប់លានក្បាលនេះ ក៏រួមចំណែកលើកស្ទួយវិស័យទេសចរណ៍ខេត្តបាត់ដំបងផងដែរ។ 
បរិយាកាសនៅរមណីយដ្ឋានភ្នំសំពៅ ពិតជាស្រស់ស្អាត។ រមណីយដ្ឋាននេះ ក៏មានកន្លែងលក់ដូរ ចំណីអាហារ ភេសជ្ជៈ ទឹកដូង និងផ្លែឈើធម្មជាតិ សម្រាប់ភ្ញៀវទេសចរ សម្រាកលំហែអារម្មណ៍ជាមួយធម្មជាតិទៀតផង៕
ប្រភព៖ មន្ទីរទេសចរណ៍ខេត្តបាត់ដំបង
