ដាណឺម៉ាកបង្កើតក្រុមឃ្លាំមើលពេលយប់តាមដានសេចក្ដីថ្លែងការណ៍លោកត្រាំ

ប្រទេសដាណឺម៉ាក ដែលជាសមាជិកណាតូ បានបង្កើតក្រុម«ការឃ្លាំមើលពេលយប់»ពិសេសមួយ ដើម្បីតាមដានសេចក្ដីថ្លែងការណ៍របស់ប្រធានាធិបតីអាមេរិក ដូណាល់ ត្រាំ។ នេះបើយោងតាមសារព័ត៌មាន Yahoo កាលពីថ្ងៃទី២៨ ខែវិច្ឆិកា ឆ្នាំ២០២៥។

ការចាត់ចែងនេះមកបន្ទាប់ពីលោកត្រាំបានប្រកាសកាលពីដើមឆ្នាំនេះថា កោះ Greenland គួរតែស្ថិតនៅក្រោមការគ្រប់គ្រងរបស់ទីក្រុងវ៉ាស៊ីនតោន។ លោកត្រាំបានស្នើទិញ Greenland ដែលជាទឹកដីស្វយ័តរបស់ប្រទេសដាណឺម៉ាក ជាលើកដំបូងក្នុងឆ្នាំ២០១៩ ដែលត្រូវបានបដិសេធយ៉ាងឆាប់រហ័ស។

កាសែតប្រចាំថ្ងៃដាណឺម៉ាក Politiken រាយការណ៍ថា ក្រសួងការបរទេសដាណឺម៉ាកបានបង្កើតក្រុម«ការឃ្លាំមើលពេលយប់»ដើម្បីតាមដានសេចក្ដីថ្លែងការណ៍របស់លោកត្រាំនៅពេលយប់ ទោះបីជាមានភាពខុសគ្នានៃពេលវេលា៦ម៉ោងរវាងប្រទេសទាំងពីរក៏ដោយ។

វេនធ្វើការរបស់ក្រុមយាមពេលយប់ត្រូវបានគេរំពឹងថានឹងចាប់ផ្ដើមនៅម៉ោង៥ល្ងាចជារៀងរាល់ថ្ងៃរហូតដល់ម៉ោង៥ព្រឹកនៅថ្ងៃបន្ទាប់។ នៅពេលដែលវេនការងារបញ្ចប់ របាយការណ៍ស្ដីពីសេចក្ដីថ្លែងការណ៍របស់លោកត្រាំត្រូវតែត្រូវបានរៀបចំឡើង និងផ្ញើទៅរដ្ឋាភិបាល និងភ្នាក់ងារពាក់ព័ន្ធ។

ការផ្លាស់ប្ដូរនេះមានគោលបំណងកាត់បន្ថយសម្ពាធលើមន្ត្រី ដោយជួយពួកគេលែងចាំបាច់លើកទូរស័ព្ទភ្លាមៗនៅពេលដែលលោកត្រាំធ្វើការប្រកាស។ ក្រុមយាមពេលយប់នឹងធ្វើបច្ចុប្បន្នភាពដល់រដ្ឋាភិបាល។