នគរបាលព្រៃឈរចាប់ខ្លួនជនសង្ស័យជួញគ្រឿងញៀនខុសច្បាប់

ខេត្តកំពង់ចាម – នៅព្រឹកថ្ងៃទី២៩ ខែវិច្ឆិកា ឆ្នាំ២០២៥ កម្លាំងជំនាញអធិការដ្ឋាននគរបាលស្រុកព្រៃឈរ បានបើកប្រតិបត្តិការបង្ក្រាបចាប់ខ្លួនជនសង្ស័យចំនួន ០១ នាក់ ដែលត្រូវបានចោទប្រកាន់ពីបទជួញដូរគ្រឿងញៀនខុសច្បាប់។

ការចាប់ខ្លួននេះធ្វើឡើងនៅវេលាម៉ោង ៨:០៥នាទី នៅផ្ទះជនសង្ស័យ ក្នុងភូមិព្រៃទទឹង ឃុំជ្រៃវៀន ស្រុកព្រៃឈរ។ ប្រតិបត្តិការនេះដឹកនាំដោយលោក វរសេនីយ៍ឯក សេង ណា អធិការនគរបាលស្រុកព្រៃឈរ ដោយមានការចូលរួមពីប៉ុស្តិ៍នគរបាលរដ្ឋបាលជ្រៃវៀន។

ជនសង្ស័យជាបុរសអាយុ ៣៣ឆ្នាំ ជាតិខ្មែរ មុខរបរលក់ដូរ មានទីលំនៅក្នុងភូមិព្រៃទទឹង។ ការចាប់ខ្លួនធ្វើឡើងយោងតាមដីកាបង្គាប់ឱ្យចាប់ខ្លួនលេខ ១១០៨ ជ/២៥ ចុះថ្ងៃទី២៧ ខែសីហា ឆ្នាំ២០២៥ ដោយលោក ហុង លីផ័ង ចៅក្រមជំនុំជម្រះសាលាដំបូងខេត្តកំពង់ចាម។

ជនសង្ស័យត្រូវបានចោទប្រកាន់ពីបទជួញដូរដោយខុសច្បាប់នូវសារធាតុញៀន ដែលបានប្រព្រឹត្តនៅរោងកាត់សក់ក្នុងភូមិណាំកិន ឃុំមៀន ក្នុងអំឡុងខែមករា និងថ្ងៃទី២១ ខែកុម្ភៈ ឆ្នាំ២០២៥។ បទនេះត្រូវបានផ្ដន្ទាទោសតាមមាត្រា៤០ កថាខណ្ឌទី៣ និងទី៤ នៃច្បាប់ស្ដីពីការត្រួតពិនិត្យគ្រឿងញៀន ដោយមានទោស ២ឆ្នាំ ៣ខែ។

បន្ទាប់ពីចាប់ខ្លួន សមត្ថកិច្ចបានបំពេញបែបបទតាមនីតិវិធី និងបញ្ជូនជនសង្ស័យទៅតុលាការដើម្បីធ្វើការស៊ើបអង្កេតបន្ថែម។