By 
នគរបាលចរាចរណ៍រាជធានីភ្នំពេញ នឹងចាប់ផ្ដើមយុទ្ធនាការអប់រំច្បាប់ចរាចរណ៍ថ្មី ចាប់ពីថ្ងៃទី១ ខែធ្នូ ឆ្នាំ២០២៥ ខាងមុខនេះ។ យុទ្ធនាការនេះផ្តោតលើការអប់រំអ្នកបើកបរ ដោយមិនពិន័យជាប្រាក់ ក្នុងគោលបំណងលើកកម្ពស់ការគោរពច្បាប់ចរាចរណ៍។
ការប្រកាសយុទ្ធនាការនេះ ធ្វើឡើងក្នុងកិច្ចប្រជុំដែលដឹកនាំដោយលោកឧត្តមសេនីយ៍ទោ ហេង រតនា ស្នងការរងទទួលផែនការងារនគរបាលចរាចរណ៍ និងលោកវរសេនីយ៍ឯក មួន សុខា ស្នងការរងទទួលដឹកនាំការិយាល័យនគរបាលចរាចរណ៍ផ្លូវគោក។
លោកឧត្តមសេនីយ៍ទោ ហេង រតនា បានដាស់តឿនពីគ្រោះថ្នាក់ចរាចរណ៍ដែលកើតឡើងដោយសារការបើកបរក្រោមឥទ្ធិពលគ្រឿងស្រវឹង។ នៅក្នុងខែវិច្ឆិកានេះ គ្រោះថ្នាក់ចរាចរណ៍បានយកជីវិតមនុស្សជាង៣០នាក់។
កម្លាំងសមត្ថកិច្ចត្រូវបានណែនាំឲ្យពង្រឹងការគោរពវិន័យ និងរក្សាក្រមសីលធម៌ល្អជាមួយពលរដ្ឋ ដើម្បីធានាសុខសុវត្ថិភាពលើផ្លូវសាធារណៈ។
