By ខេត្តស្វាយរៀង៖ លោក រស់ ផារិទ្ធ អភិបាលរងខេត្តស្វាយរៀង នារសៀលថ្ងៃទី២៨ ខែវិច្ឆិកា ឆ្នាំ២០២៥ បានអញ្ជើញបើកការដ្ឋានជុសជុលផ្លូវលំទៅជាផ្លូវចាក់បេតុងអាម៉េប្រវែង៩០០ម៉ែត្រ នៅភូមិសេកយំ ឃុំពងទឹក ស្រុករំដួល។
លោក រស់ ផារិទ្ធ បានអះអាងថា ផ្លូវនេះមានសារៈសំខាន់ខ្លាំងណាស់សម្រាប់ប្រជាពលរដ្ឋក្នុងតំបន់ ដែលនឹងជួយសម្រួលដល់ការធ្វើដំណើរ និងការដឹកកសិផលទៅកាន់ទីផ្សារ។
លោកបានសន្យាថា នឹងបន្តជួសជុលផ្លូវបេតុងបន្ថែមទៀតនៅឃុំពងទឹកក្នុងឆ្នាំក្រោយៗ។ គម្រោងនេះជាផ្នែកមួយនៃមូលនិធិឃុំឆ្នាំ២០២៥ ដែលកើតឡើងដោយសារសន្តិភាព និងស្ថិរភាពក្រោមការដឹកនាំរបស់រាជរដ្ឋាភិបាល។
លោកបានស្នើឱ្យអាជ្ញាធរ និងប្រជាពលរដ្ឋចូលរួមថែរក្សាសន្តិភាព និងផ្លូវថ្មីនេះឱ្យបានល្អប្រសើរ។ លោកក៏បានជំរុញឱ្យក្រុមហ៊ុនសាងសង់ធានាគុណភាពផ្លូវតាមបទដ្ឋានបច្ចេកទេស។
សមិទ្ធផលនេះកើតចេញពីការរួបរួមសាមគ្គីរវាងថ្នាក់ដឹកនាំ មន្ត្រីរាជការ និងការចូលរួមរបស់ប្រជាពលរដ្ឋទាំងអស់។
ដោយ៖ សុថាន
