ក្រសួងការងារនិងបណ្ដុះបណ្ដាលវិជ្ជាជីវៈ បើកផ្លូវសហប្រតិបត្តិការថ្មីជាមួយធនាគារអាល្លឺម៉ង់

ភ្នំពេញ – នាថ្ងៃទី២៨ ខែវិច្ឆិកា ឆ្នាំ២០២៥ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានជួបពិភាក្សាការងារជាមួយលោក Thomas Finken តំណាងធនាគារអភិវឌ្ឍន៍អាល្លឺម៉ង់ (KFW) នៅទីស្តីការក្រសួង។

ឯកឧត្តមរដ្ឋមន្ត្រី បានសម្តែងការស្វាគមន៍យ៉ាងកក់ក្តៅ និងបញ្ជាក់ពីការគាំទ្រពេញទំហឹងចំពោះកិច្ចសហប្រតិបត្តិការជាមួយធនាគារ KFW ជាពិសេសក្នុងវិស័យសន្តិសុខសង្គម។ លោកក៏បានលើកឡើងពីលទ្ធភាពសហការលើវិស័យបណ្ដុះបណ្ដាលវិជ្ជាជីវៈ ដើម្បីអភិវឌ្ឍធនធានមនុស្សនៅកម្ពុជា។

ជាការឆ្លើយតប លោក Thomas Finken បានថ្លែងអំណរគុណ និងកោតសរសើរចំពោះកិច្ចខិតខំប្រឹងប្រែងរបស់ក្រសួង។ លោកក៏បានបង្ហាញចំណាប់អារម្មណ៍ក្នុងការស្វែងយល់បន្ថែមអំពីបេសកកម្មអាទិភាពថ្មីៗ និងលទ្ធភាពសហការលើគម្រោងថ្មីៗផ្សេងទៀត។

កិច្ចសហប្រតិបត្តិការនេះ សំដៅចូលរួមធ្វើឱ្យប្រសើរឡើងនូវសុខុមាលភាពរបស់ប្រជាជនកម្ពុជាទាំងអស់ និងរួមចំណែកដល់ការអភិវឌ្ឍប្រកបដោយចីរភាពរយៈពេលវែង។

ប្រភព៖ ក្រសួងព័ត៍មាន