By ភ្នំពេញ៖ នគរបាលរាជធានីភ្នំពេញនឹងចាប់ផ្តើមយុទ្ធនាការអប់រំចរាចរណ៍ថ្មីចាប់ពីថ្ងៃទី១ ខែធ្នូ ឆ្នាំ២០២៥ ខាងមុខ ដោយផ្តោតលើការអប់រំ និងការណែនាំពលរដ្ឋដែលល្មើសច្បាប់ ជំនួសឱ្យការផាកពិន័យប្រាក់។
កិច្ចប្រជុំផ្សព្វផ្សាយផែនការការងារជំនាញនេះត្រូវបានដឹកនាំដោយលោកឧត្តមសេនីយ៍ទោ ហេង រតនា ស្នងការរងទទួលផែនការងារនគរបាលចរាចរណ៍ និងលោកវរសេនីយ៍ឯក មួន សុខា ស្នងការរងទទួលដឹកនាំការិយាល័យនគរបាលចរាចរណ៍ផ្លូវគោក។
លោកឧត្តមសេនីយ៍ទោ ហេង រតនា បានណែនាំដល់កម្លាំងសមត្ថកិច្ចឱ្យពង្រឹងការគោរពវិន័យ និងរក្សាក្រមសីលធម៌ល្អជាមួយពលរដ្ឋ ពេលចុះអនុវត្តភារកិច្ចការងារ។ លោកបានផ្ញើសារដាស់តឿនដល់បងប្អូនពលរដ្ឋអ្នកដំណើរ បើស្រវឹងសូមកុំបើកបរ ព្រោះគ្រឿងស្រវឹងនឹងធ្វើឱ្យបាត់បង់ភាពម្ចាស់ការលើខ្លួនឯង។
អត្រានៃគ្រោះថ្នាក់ចរាចរណ៍ភាគច្រើនកើតឡើងដោយសារកត្តាបើកបរដោយប្រើប្រាស់គ្រឿងស្រវឹង ពិសេសនាពេលរាត្រី។ ខណៈក្នុងខែវិច្ឆិកានេះ គ្រោះថ្នាក់ចរាចរណ៍បានឆក់យកអាយុជីវិតមនុស្សជាង៣០នាក់។
កិច្ចប្រជុំនេះមានការចូលរួមពីនាយ-នាយរងការិយាល័យ នាយផ្នែក អធិការរងនគរបាលខណ្ឌទាំង១៤ ទទួលការងារចរាចរណ៍ និងមន្ត្រីពាក់ព័ន្ធមួយចំនួនទៀត។
ដោយ៖ តារា
