By ភូមិធន់មន់ សង្កាត់បារាយណ៍ ក្រុងដូនកែវ ខេត្តតាកែវ កាលពីយប់ថ្ងៃទី២៨ វិច្ឆិកា ២០២៥ បានកើតហេតុហិង្សាឃោរឃៅ នៅពេលស្ត្រីជាប្រពន្ធចុងនាំញាតិមិត្តចំនួន៥នាក់ចុះវាយស្ត្រីជាប្រពន្ធដើមឲ្យរងរបួសធ្ងន់ រួចស្រោចសាំងដុត។
អាជ្ញាធរមូលដ្ឋានបានបញ្ជាក់ថា ហេតុការណ៍នេះកើតឡើងដោយសារទំនាស់ស្នេហារបស់បុរសវ័យចំណាស់ ប៊ន បូ អាយុ៥៤ឆ្នាំ ដែលមានទំនាក់ទំនងស្នេហាជាមួយស្ត្រីឈ្មោះនាង ម៉េង អស់រយៈពេលជាង១០ឆ្នាំ។
សាក្សីក្នុងភូមិបានរាយការណ៍ថា មុនពេលកើតហេតុ ស្ត្រីជាប្រពន្ធដើមលឹម ឡៃហុន អាយុ៤០ឆ្នាំ ទើបតែទៅថ្លឹងស្រូវវិញ ហើយត្រូវបានក្រុមខាងប្រពន្ធចុងដែលត្រៀមព្រនង់ ដំបង និងប្រេងសាំងជាស្រេច ចាប់វាយឲ្យរងរបួសធ្ងន់ រួចស្រោចសាំងដុត។
ភាគីជនបង្កទាំង៥នាក់រួមមាន នាង ម៉េង (ប្រពន្ធចុង), វី សៀវមុី (កូនប្រពន្ធចុង), វី ឈុនឈី (កូនប្រពន្ធចុង), នាង ផារី (ប្អូនស្រីប្រពន្ធចុង) និង សូត្រ ប្រុសឈ្នះ (កូនប្អូនស្រីប្រពន្ធចុង)។
បន្ទាប់ពីហេតុការណ៍ ស្ត្រីរងគ្រោះត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តតាកែវ ហើយបានចាកចេញពីបន្ទប់សង្គ្រោះបន្ទាន់ហើយ។ រីឯភាគីជនបង្កត្រូវបាននគរបាលឃាត់ខ្លួន៣នាក់ ប៉ុន្តែត្រូវបានដោះលែង២នាក់ ដោយមានតែប្រពន្ធចុងម្នាក់ប៉ុណ្ណោះដែលនៅតែត្រូវឃាត់ខ្លួន។
ប្រជាពលរដ្ឋក្នុងភូមិកំពុងរង់ចាំមើលថាតើជនរងគ្រោះនឹងទទួលបានយុត្តិធម៌ដែរឬទេ។
