សិស្ស២នាក់ចាប់បានក្រោយពីណាត់វាយគ្នាក្រៅសាលា នៅស្រុកស្វាយទាប

ខេត្តស្វាយរៀង៖ កម្លាំងនគរបាលស្រុកស្វាយទាបបានចាប់ខ្លួនសិស្សចំនួន២នាក់ បន្ទាប់ពីមានវីដេអូបែកធ្លាយពីការណាត់វាយគ្នាក្រៅសាលានៅផ្លូវបេតុង ភូមិបន្ទាយ ឃុំកណ្តៀងរាយ។

សិស្សដែលត្រូវបានចាប់ខ្លួនរួមមាន សេង ស៊ុកសុភក្ត្រា អាយុ១៥ឆ្នាំ រៀនថ្នាក់ទី៩A និង វិត ដេវីត អាយុ១៣ឆ្នាំ រៀនថ្នាក់ទី៩F។ ការវាយគ្នាបានកើតឡើងនៅថ្ងៃព្រហស្បតិ៍ទី២៧ ខែវិច្ឆិកា វេលាម៉ោង១១:១០នាទី។

នៅចំពោះមុខសមត្ថកិច្ច សិស្សទាំងពីរបានសារភាពថាពិតជាបានណាត់វាយគ្នាជាមួយ គិន សំណាង អាយុ១៧ឆ្នាំ ដែលមានជំងឺប្រចាំកាយ។ ក្រោយពីសួរនាំ សិស្សអាយុ១៥ឆ្នាំត្រូវបានបញ្ជូនទៅការិយាល័យជំនាញខេត្ត ខណៈសិស្សអាយុ១៣ឆ្នាំត្រូវបានអនុញ្ញាតឲ្យវិលទៅផ្ទះវិញ ដោយមានការធានាពីអាណាព្យាបាល។

ការចាប់ខ្លួននេះបានកើតឡើងក្រោយពីកម្លាំងជំនាញនគរបាលស្រុកស្វាយទាប សហការជាមួយប៉ុស្តិ៍រដ្ឋបាលឃុំកណ្តៀងរាយ និងគណៈនាយកសាលាវិទ្យាល័យហ៊ុនសែនប្រសូត្រ ធ្វើការស្រាវជ្រាវយ៉ាងហ្មត់ចត់។