ថៃបិទច្រកព្រំដែនជាបណ្តោះអាសន្នជាមួយមីយ៉ាន់ម៉ា ក្រោយការប្រយុទ្ធគ្នាខ្លាំងក្លា

(បាងកក)៖ អាជ្ញាធរថៃបានសម្រេចបិទច្រកព្រំដែនជាបណ្តោះអាសន្នជាមួយមីយ៉ាន់ម៉ា បន្ទាប់ពីការប្រយុទ្ធគ្នារវាងក្រុមប្រដាប់អាវុធជនជាតិភាគតិច Karen National Union (KNU) និងកងកម្លាំងយោធាមីយ៉ាន់ម៉ា នៅក្រុង Myawaddy រដ្ឋ Karen បានកើនឡើងខ្លាំងកាលពីថ្ងៃអាទិត្យកន្លងទៅ។

ការប្រយុទ្ធគ្នាដ៏ខ្លាំងក្លានេះបានជំរុញឱ្យអាជ្ញាធរថៃចេញសេចក្តីថ្លែងការណ៍បិទច្រកព្រំដែនរយៈពេល៧ថ្ងៃ ដើម្បីរារាំងការធ្វើដំណើររបស់ជនស៉ីវិល និងក្រុមប្រដាប់អាវុធឆ្លងព្រំដែន។ មានតែស្ពានមិត្តភាពថៃ-មីយ៉ាន់ម៉ាទី១ នៅស្រុក Mae Sot ប៉ុណ្ណោះដែលនៅបន្តបើកសម្រាប់ការធ្វើដំណើរធម្មតា។

អាជ្ញាធរថៃបានរកឃើញថា កាលពីថ្ងៃអាទិត្យទី៣០វិច្ឆិកា គ្រាប់កាំភ្លើងត្បាល់៥គ្រាប់ពីការប្រយុទ្ធគ្នានៅមីយ៉ាន់ម៉ាបានធ្លាក់ចូលទឹកដីថៃ បណ្តាលឱ្យរបួសជនជាតិមីយ៉ាន់ម៉ា២នាក់ដែលរស់នៅជាមួយអ្នកស្រុកថៃ។ អាជ្ញាធរថៃបានព្រមានយ៉ាងខ្លាំងថា ការបាញ់ផ្លោងណាមួយដែលឆ្លងចូលមកទៀតនឹងត្រូវឆ្លើយតបវិញភ្លាមៗ។

ស្ថានភាពនៅតំបន់ព្រំដែននៅតែតានតឹង ដោយកងកម្លាំងសន្តិសុខថៃបានបង្កើនការត្រួតពិនិត្យ និងដាក់កងកម្លាំងបន្ថែមតាមបណ្តោយព្រំដែនដើម្បីការពារសន្តិសុខជាតិ និងសុវត្ថិភាពពលរដ្ឋ។ ការបិទច្រកព្រំដែននេះគឺជាវិធានការប្រកាន់ខ្ជាប់ដើម្បីការពារការរំខានពីសង្រ្គាមស៉ីវិលនៅមីយ៉ាន់ម៉ា។