By ថៃ៖ ស្ថានភាពទឹកជំនន់នៅខេត្តសុងក្លាបន្តធ្ងន់ធ្ងរ ដោយគិតត្រឹមថ្ងៃទី៣០ វិច្ឆិកា ២០២៥ មានអ្នកស្លាប់កើនឡើងដល់ ១៣១នាក់ ដែលទាំងអស់លង់ទឹក។
ស្រុកហាតយ៉ៃជាតំបន់រងផលប៉ះពាល់ខ្លាំងបំផុត ដោយមានប្រជាជនចំនួន ២៤៣,០០០នាក់រងផលប៉ះពាល់។ តាមរបាយការណ៍ពីមជ្ឈមណ្ឌលបញ្ជាការបង្ការ និងកាត់បន្ថយគ្រោះមហន្តរាយខេត្តសុងក្លា ស្ថានភាពនេះបានប៉ះពាល់ដល់ស្រុកចំនួន ១៦ ស្រុករងចំនួន ១២៧ និងភូមិចំនួន ៩៩២ ដែលប៉ះពាល់ដល់មនុស្សជាង ១,៣លាននាក់។
មនុស្សសរុបចំនួន ៤២,៤៧២នាក់ត្រូវបានជម្លៀសចេញ និងតំបន់ជាច្រើននៅតែលិចទឹក ជាពិសេសនៅឧបទ្វីបសាទីងព្រះ ដែលកម្រិតទឹកនៅតែខ្ពស់ដោយសារទឹកហូរត្រឡប់មកពីបឹង។
នៅស្រុកហាតយ៉ៃ មានអ្នកជម្លៀសជាង ១២,៨០០នាក់ ហើយខេត្តនេះបានបង្កើតជម្រកចំនួន ២៤ ដោយផ្តល់ការគាំទ្រនៅតាមសាលារៀន វត្តអារាម និងមជ្ឈមណ្ឌលថែទាំកុមារ។ អង្គភាពផ្ទះបាយរាជវង្ស និងផ្ទះបាយយោធាកំពុងផលិតអាហាររាប់ម៉ឺនក្នុងមួយថ្ងៃៗ។
ការខូចខាតធ្ងន់ធ្ងរត្រូវបានកត់ត្រានៅទូទាំងហេដ្ឋារចនាសម្ព័ន្ធ៖ ផ្ទះចំនួន ១៧ខ្នងត្រូវបានបំផ្លាញទាំងស្រុង ផ្ទះជាង ១,១០០ខ្នងខូចខាតដោយផ្នែក សាលារៀន វត្តអារាម វិហារអ៊ីស្លាម ផ្លូវថ្នល់ និងស្ពានរាប់រយកន្លែងត្រូវបានរងផលប៉ះពាល់។
កងទ័ពតំបន់ទីបួន និងអង្គភាពរដ្ឋាភិបាលផ្សេងទៀតបានចល័តបុគ្គលិកជាង ៦៥០នាក់ រួមជាមួយឡានដឹកទំនិញ រថយន្តតួខ្ពស់ ទូកបាតរាបស្មើ យន្តហោះ និងក្រុមគ្រូពេទ្យចល័ត។ កាកសំណល់ជាង ៨,០០០តោនត្រូវបានសម្អាត ហើយអាហារ និងទឹកស្អាតជាង ២៤០,០០០ឈុតត្រូវបានចែកចាយ។
សារព័ត៌មានថៃបន្តថា ការព្យាករណ៍ពីថ្ងៃទី២៩វិច្ឆិកា ដល់ថ្ងៃទី៥ធ្នូ ទឹកភ្លៀងត្រូវបានគេរំពឹងថានឹងថយចុះមកត្រឹមភ្លៀងធ្លាក់តាមរដូវធម្មតា។ កម្រិតទឹកនៅក្នុងទីក្រុងហាតយ៉ៃស្ទើរតែវិលមករកភាពធម្មតាវិញហើយ។
ដោយ៖ សិលា
