ឈាមរលួយក្នុងគ្រួសារ៖ ប្រពន្ធចុងព្រួតគ្នាវាយ និងចាក់សាំងដុតប្រពន្ធដើម ជនដៃដល់៤នាក់បញ្ជូនតុលាការ

កម្លាំងអធិការដ្ឋាននគរបាលក្រុងដូនកែវ បានចាប់ខ្លួនជនសង្ស័យចំនួន៤នាក់ និងបញ្ជូនទៅសាលាដំបូងខេត្តតាកែវ ដើម្បីចាត់ការតាមច្បាប់ បន្ទាប់ពីពួកគេបានព្រួតគ្នាវាយ និងចាក់សាំងដុតប្រពន្ធដើមម្នាក់ឲ្យរងរបួសធ្ងន់ធ្ងរកាលពីថ្ងៃទី២៨ វិច្ឆិកា។

លោក ឥន្ទ មណ្ឌល អធិការនគរបាលក្រុងដូនកែវ បានបញ្ជាក់ថា ហេតុការណ៍នេះបានកើតឡើងនៅម៉ោង៧យប់ ថ្ងៃទី២៨ វិច្ឆិកា នៅភូមិធន់មន់ សង្កាត់បារាយណ៍។ ជនសង្ស័យមានឈ្មោះ នាង លីម៉េង (ប្រពន្ធចុង) អាយុ៤០ឆ្នាំ, នាង ផារី អាយុ៣៥ឆ្នាំ, វី សៀវម៉ី អាយុ១៩ឆ្នាំ និង វី ឈុនឈី អាយុ១៨ឆ្នាំ។

ជនរងគ្រោះ លីម ឡៃហុន (ប្រពន្ធដើម) អាយុ៤០ឆ្នាំ បានរងរបួសធ្ងន់ធ្ងរនៅត្រចៀកឆ្វេង កញ្ចឹងក ខ្នង ស្មាឆ្វេង និងមានស្នាមឆេះភ្លើងធ្ងន់។ នាងត្រូវបានបញ្ជូនទៅមន្ទីរពេទ្យបង្អែកខេត្តតាកែវដើម្បីសង្គ្រោះ។

ក្រោយកើតហេតុ កម្លាំងសមត្ថកិច្ចបានចាប់ខ្លួនជនសង្ស័យទាំង៤នាក់ ហើយបញ្ជូនសំណុំរឿងទៅសាលាដំបូងខេត្តតាកែវ ដើម្បីអនុវត្តតាមនីតិវិធីច្បាប់។