By ភ្នំពេញ៖ លោកបណ្ឌិត កៅ មុយថង អ្នកវិភាគសង្គមដ៏ល្បីល្បាញនៅកម្ពុជា បានបង្ហាញការគាំទ្រយ៉ាងពេញទំហឹងចំពោះសេចក្តីថ្លែងការណ៍របស់ក្រសួងការបរទេស និងសហប្រតិបត្តិការអន្តរជាតិ ដែលបញ្ជាក់ឡើងវិញនូវជំហររបស់កម្ពុជាក្នុងការប្រកាន់ខ្ជាប់គោលនយោបាយចិនតែមួយ។
បណ្ឌិត កៅ មុយថង បានពន្យល់ថា៖ «ការបដិសេធគោលការណ៍ចិនតែមួយ គឺជាទង្វើបង្កហេតុដែលគំរាមកំហែងដល់ស្ថិរភាព និងសន្តិសុខទាំងក្នុងតំបន់ និងពិភពលោកទាំងមូល។ កម្ពុជាតែងតែបញ្ជាក់ជំហររបស់ខ្លួនឡើងវិញលើគោលការណ៍នេះ ដើម្បីបង្ហាញជាសាធារណៈនូវទំនាក់ទំនងជិតស្និទ្ធ និងយូរអង្វែងរបស់កម្ពុជាជាមួយនឹងចិន។»
អ្នកវិភាគសង្គមបានបន្តថា កម្ពុជាចាត់ទុកបញ្ហានេះជាផ្នែកនៃកិច្ចការផ្ទៃក្នុងរបស់ប្រទេសចិន ហើយកម្ពុជាតែងប្រកាន់យកគោលការណ៍មិនជ្រៀតជ្រែក។ លោកបានរំលឹកថា គោលការណ៍ចិនតែមួយគឺជាលក្ខខណ្ឌមូលដ្ឋានសម្រាប់ការបង្កើត និងរក្សាទំនាក់ទំនងផ្លូវការជាមួយប្រទេសចិន ដែលផ្អែកលើការសម្រេចចិត្តរបស់អង្គការសហប្រជាជាតិលេខ២៧៥៨ នៅឆ្នាំ១៩៧១។
សេចក្តីថ្លែងការណ៍នេះធ្វើឡើងដើម្បីឆ្លើយតបទៅនឹងការសាកសួររបស់ប្រព័ន្ធផ្សព្វផ្សាយមួយចំនួន ទាក់ទងនឹងទស្សនៈរបស់កម្ពុជាជុំវិញកោះតៃវ៉ាន់។ ក្រសួងការបរទេសបានបញ្ជាក់ថា កម្ពុជាគាំទ្រយ៉ាងពេញទំហឹងចំពោះកិច្ចប្រឹងប្រែងនានាក្នុងការរក្សាសន្តិភាព ស្ថិរភាព និងភាពសុខដុមរមនាក្នុងតំបន់។
ប្រភព៖ CCFR
