By ក្រចេះ៖ កងរាជអាវុធហត្ថខេត្តក្រចេះបានរាយការណ៍អំពីលទ្ធផលការងារបង្ក្រាបបទល្មើសក្នុងរយៈពេល១ឆ្នាំចុងក្រោយ ដោយឃាត់ខ្លួនជនសង្ស័យសរុប១៤៤នាក់ ក្នុងនោះមានស្រី១៣នាក់។
យោងតាមរបាយការណ៍ផ្លូវការ ចាប់ពីថ្ងៃទី២១ ខែវិច្ឆិកា ឆ្នាំ២០២៤ ដល់ថ្ងៃទី២៨ ខែវិច្ឆិកា ឆ្នាំ២០២៥ សមត្ថកិច្ចបានបង្ក្រាបបទឧក្រិដ្ឋ៤៥លើក បទល្មើសមជ្ឈិម១៩លើក និងសហការបង្ក្រាប១លើក។
កម្លាំងជំនាញបានបញ្ជូនជនសង្ស័យ១០៦នាក់ទៅកាន់សាលាដំបូងខេត្តក្រចេះ រួមជាមួយវត្ថុតាងដ៏សំខាន់ៗ។
ក្នុងចំណោមវត្ថុតាងដែលរកឃើញមាន៖
- ម្សៅក្រាមសថ្លាសង្ស័យជាសារធាតុញៀនមេតំហ្វេតាមីន ៣០២កញ្ចប់ (១,៧៣១.៧៤ក្រាម)
- ជញ្ជីងថ្លឹងសារធាតុញៀន ១៩គ្រឿង
- ម៉ូតូ ៦៤គ្រឿង
- ទូរស័ព្ទ ៨០គ្រឿង
- កាំភ្លើងកែច្នៃ ២ដើម
- អាវុធផ្សេងៗ (កាំបិតផ្គាក់, ដាវ, កាំបិតប៉័ងតោ)
ការប្រតិបត្តិការនេះបង្ហាញពីការខិតខំប្រឹងប្រែងរបស់សមត្ថកិច្ចក្នុងការបង្ក្រាបបទល្មើស និងការពារសន្តិសុខសង្គមក្នុងខេត្តក្រចេះ។
អត្ថបទ៖ ប្រុញ វិធិន
