រូបថតចាស់ឆ្នាំ២០១៤ជាមួយមេបោកប្រាស់ អានុទីនអះអាងថា ‘ជួបគ្នាដោយចៃដន្យ’

នាយករដ្ឋមន្ត្រីថៃ លោក អានុទីន ឆានវីរៈគុល បានច្រានចោលការសើរើរូបថតចាស់ដែលបង្ហាញរូបលោកកំពុងបរិភោគអាហារជាមួយលោក Ben Smith អ្នកហិរញ្ញវត្ថុដែលត្រូវបានចោទប្រកាន់ថាជាមេបោកប្រាស់ឆ្លងដែន។

លោកអានុទីនបានបញ្ជាក់ថា ការជួបគ្នានេះបានកើតឡើងតាំងតែពីឆ្នាំ២០១៤ ហើយវាជារឿងចៃដន្យសុទ្ធសាធ។ យោងតាមការចុះផ្សាយនាថ្ងៃទី៤ខែធ្នូឆ្នាំ២០២៥របស់ Thai Enquirer លោកអានុទីនបាននិយាយថា រូបថតនេះត្រូវបានថតនៅប្រទេសសិង្ហបុរីភ្លាមៗបន្ទាប់ពីរដ្ឋប្រហារយោធា។

លោកបានប្រាប់អ្នកយកព័ត៌មានថា «ខ្ញុំបានជួបគាត់នៅទីនោះដោយចៃដន្យ។ គ្មានការជាប់ពាក់ព័ន្ធបន្តទៀតទេ»។

លោក Smith ដែលត្រូវបានគេកំណត់អត្តសញ្ញាណក្នុងប្រព័ន្ធផ្សព្វផ្សាយបរទេសថាជាអ្នកហិរញ្ញវត្ថុដើមកំណើតអាហ្វ្រិកខាងត្បូងឈ្មោះ Benjamin Mauerberger ត្រូវបានគេភ្ជាប់ទៅនឹងបណ្ដាញឆបោក និងការលាងលុយកខ្វក់ដ៏ធំដែលកំពុងប្រតិបត្តិការទូទាំងប្រទេសថៃ។

លោកអានុទីនបានបញ្ជាក់ថា លោកបានដឹងយ៉ាងច្បាស់ពីប្រវត្តិរបស់លោក Smith ហើយបានកត់សម្គាល់ថា ក្នុងនាមជារដ្ឋមន្ត្រីក្រសួងមហាផ្ទៃ លោកផ្ទាល់បានច្រានចោលពាក្យសុំសញ្ជាតិថៃរបស់លោក Smith។

លោកបានបន្ថែមថា គ្មានការចោទប្រកាន់ពីបទឆបោកណាមួយបានកើតឡើងនៅពេលជួបគ្នាក្នុងឆ្នាំ២០១៤ទេ ហើយបានចង្អុលបង្ហាញទៅលើការរឹបអូសទ្រព្យសម្បត្តិដែលធ្វើឡើងក្រោមរដ្ឋាភិបាលរបស់លោកផ្ទាល់ថាជាភស្តុតាងដែលថា លោកគ្មានទំនាក់ទំនងជាមួយលោក Smith នោះឡើយ។