By សៀមរាប៖ អាជ្ញាធរក្រុងសៀមរាបបានចាប់ផ្ដើមជួសជុលផ្លូវមួយខ្សែប្រវែង ២គីឡូម៉ែត្រនៅសង្កាត់ជ្រាវ ដោយសាងសង់ជាផ្លូវកៅស៊ូ ក្រោយពន្យារពេលដោយសាររដូវភ្លៀងខ្លាំង។
មន្ត្រីសង្កាត់ជ្រាវបានបញ្ជាក់នៅថ្ងៃទី៤ ធ្នូ ២០២៥ ថា ផ្លូវដែលកំពុងជួសជុលនេះមានទទឹង ៨ម៉ែត្រ និងជើងទេផ្លូវប្រវែង ៩ម៉ែត្រ។ ផ្លូវនេះតភ្ជាប់ពីវិថីសម្ដេចជា ស៊ីម ទៅកាន់ផ្លូវក្រវាត់ក្រុងទី២ និងទី៣។
លោកបានឱ្យដឹងថា ការជួសជុលនេះទទួលបានការគាំទ្រថវិកាពីអ្នកឧកញ៉ា សៀង ណាំ អ្នកតំណាងរាស្ត្រខេត្តសៀមរាប លោក ប្រាក់ សោភ័ណ អភិបាលខេត្ត និងសាលាក្រុង។
កន្លងមក ផ្លូវនេះបង្កការលំបាកខ្លាំងដល់ប្រជាពលរដ្ឋ និងភ្ញៀវទេសចរ ដោយអាជ្ញាធរធ្លាប់រៀបចំជួសជុលម្ដងហើយ ប៉ុន្តែត្រូវពន្យារដោយសារភ្លៀងធ្លាក់ខ្លាំង។
ពលរដ្ឋក្នុងតំបន់បានបង្ហាញក្ដីរំភើបចំពោះការអភិវឌ្ឍន៍ផ្លូវថ្នល់ ដែលនឹងជួយសម្រួលដល់ការធ្វើចរាចរណ៍ និងការដឹកជញ្ជូនភ្ញៀវទេសចរ។
ការជួសជុលផ្លូវនេះត្រូវបានរំពឹងថានឹងបញ្ចប់ឆាប់ៗ ដើម្បីធានាភាពងាយស្រួលក្នុងការធ្វើដំណើររបស់ប្រជាពលរដ្ឋ និងជំរុញសកម្មភាពទេសចរណ៍ក្នុងតំបន់។
