By ខេត្តកំពង់ធំ៖ កងកម្លាំងចម្រុះដឹកនាំដោយឧត្តមសេនីយ៍ទោ សោម ស៊ុន បានវាយកំទេចឡធ្យូងខុសច្បាប់ចំនួន ៥ ឡ នៅក្នុងស្រុកសណ្ដាន់ កាលពីព្រឹកថ្ងៃទី៣ ធ្នូ ២០២៥។
សកម្មភាពនេះធ្វើឡើងក្រោមការដឹកនាំរបស់លោក ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ដែលបានអមដំណើរដោយលោក ទី ថាវី អភិបាលរងស្រុកសណ្ដាន់។
លោកឧត្តមសេនីយ៍ទោ សោម ស៊ុន បានបញ្ជាក់ថា៖ “សកម្មភាពលួចកាប់ព្រៃឈើដើម្បីយកមកដុតធ្យូងនៅតែបន្តកើតឡើងនៅតំបន់មួយចំនួនក្នុងស្រុកសណ្ដាន់។ ទោះបីជាមានការណែនាំ និងកិច្ចសន្យារួចហើយក៏ដោយ ក្រុមជនល្មើសមួយចំនួននៅតែបន្តបំពាន។”
កងកម្លាំងចម្រុះបានវាយបំផ្លាញឡដុតធ្យូងខុសច្បាប់ចំនួនពីរទីតាំង ដែលស្ថិតនៅក្នុងឃុំមានរិទ្ធ និងឃុំសណ្ដាន់។ ឡទាំងនេះត្រូវបានជនល្មើសប្រើប្រាស់ដើម្បីដុតធ្យូងពីឈើដែលលួចកាប់មក។
លោកឧត្តមសេនីយ៍ទោ សោម ស៊ុន បានប្រគល់ភារកិច្ចឱ្យអាជ្ញាធរដែនដី និងមន្ត្រីព្រៃឈើបន្តសកម្មភាពអប់រំ និងវាយកំទេចឡធ្យូងខុសច្បាប់ដែលនៅសេសសល់ឱ្យអស់។ លោកបានអំពាវនាវឱ្យប្រជាពលរដ្ឋរួមគ្នាថែរក្សាព្រៃឈើដែលជាធនធានធម្មជាតិសម្រាប់សង្គមជាតិ។
សកម្មភាពនេះធ្វើឡើងតាមបទបញ្ជារបស់ថ្នាក់ដឹកនាំកងយោធពលខេមរភូមិន្ទ និងការដឹកនាំផ្ទាល់របស់លោក នួន ផារ័ត្ន អភិបាលខេត្តកំពង់ធំ ក្នុងការការពារធនធានធម្មជាតិ។
កងកម្លាំងអន្តរាគមន៍រួមមានបញ្ជាការដ្ឋានតំបន់ប្រតិបត្តិការសឹករងកំពង់ធំ អាជ្ញាធរដែនដី កងកម្លាំងចម្រុះ និងមន្ត្រីស្ថាប័នជំនាញរដ្ឋបាលព្រៃឈើ។
លោកឧត្តមសេនីយ៍ទោ សោម ស៊ុន បានជំរុញឱ្យមានការសហការជាមួយប្រជាពលរដ្ឋក្នុងការថែរក្សាព្រៃឈើ ដើម្បីធានាថាធនធានធម្មជាតិនឹងនៅគង់វង្សសម្រាប់អនាគត។
សកម្មភាពនេះបង្ហាញពីការតស៊ូមុតមាំរបស់អាជ្ញាធរក្នុងការទប់ស្កាត់បទល្មើសព្រៃឈើ និងការពារបរិស្ថានធម្មជាតិឱ្យបានយូរអង្វែង។
ដោយ៖ តារា
