By (កំពង់ស្ពឺ)៖ កម្លាំងសមត្ថកិច្ចចម្រុះមន្ត្រីស្ថានីយជញ្ជីងកណ្តោលដុំ ខេត្តកំពង់ស្ពឺ បានចុះប្រតិបត្តិការឆ្មក់ចាប់ត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ នាយប់ថ្ងៃទី២ ខែធ្នូ ឆ្នាំ២០២៥។
យានយន្តទាំងនេះបានគេចវាងស្ថានីយតាមផ្លូវជាតិលេខ៤៤ គ.មលេខ១០៨ (ទិសដៅពីឱរ៉ាល់ ឆ្ពោះទៅផ្លូវជាតិលេខ៥) ក្រុងច្បារមន ខេត្តកំពង់ស្ពឺ។ កម្លាំងសមត្ថកិច្ចបានឃាត់ថ្លឹងយានយន្តចំនួន ៣គ្រឿង ដែលកំពុងដឹកដំឡូង និងស្ករស មានបិទឡូហ្គោ CT។
យានយន្តទាំងនេះផ្ទុកទម្ងន់សរុបចន្លោះពី ៤៩តោនដល់៨៤តោន ដែលលើសទម្ងន់អនុញ្ញាតចន្លោះពី ៩តោនដល់៣៩តោន ដោយលើសពីកម្រិតដែលច្បាប់បានកំណត់។
ក្រសួងសាធារណការ និងដឹកជញ្ជូន សូមក្រើនរម្លឹកដល់ម្ចាស់ក្រុមហ៊ុនដឹកជញ្ជូនធុនធ្ងន់ ម្ចាស់យានយន្ត និងអ្នកបើកបរទាំងអស់ សូមគោរពច្បាប់ឱ្យបានត្រឹមត្រូវ កុំផ្ទុកទម្ងន់លើសកម្រិតអនុញ្ញាត។
ក្រុមការងារនៅតែបន្តចុះឆ្មក់ត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់នៅទូទាំងប្រទេស ដើម្បីទប់ស្កាត់ និងចាត់វិធានការរឹតបន្តឹងការអនុវត្តច្បាប់យ៉ាងតឹងរ៉ឹងដោយគ្មានការលើកលែង។
ការប្រតិបត្តិការនេះជាផ្នែកមួយនៃយុទ្ធសាស្ត្រទប់ស្កាត់ការបំពានច្បាប់លើការដឹកជញ្ជូន ដើម្បីការពារសុវត្ថិភាពផ្លូវថ្នល់ និងបង្កើនអាយុកាលប្រើប្រាស់ផ្លូវថ្នល់។
