អភិបាលខេត្តកណ្ដាលចុះពិនិត្យទឹកលិចក្នុងស្រុកកៀនស្វាយ ណែនាំដោះស្រាយបញ្ហាប្រជាពលរដ្ឋឲ្យទាន់ពេល

អភិបាលខេត្តកណ្ដាល លោក គួច ចំរើន បានដឹកនាំការចុះពិនិត្យស្ថានភាពទឹកលិចដោយសារទឹកភ្លៀងនៅក្នុងស្រុកកៀនស្វាយ នៅថ្ងៃទី៤ ខែធ្នូ ឆ្នាំ២០២៥ ដោយណែនាំដល់អាជ្ញាធរមូលដ្ឋានឲ្យយកចិត្តទុកដាក់ខ្ពស់ចំពោះបញ្ហាទឹកលិចដែលប៉ះពាល់ដល់ផ្លូវ សាលារៀន និងផ្ទះសំបែងរបស់ប្រជាពលរដ្ឋក្នុងឃុំឈើទាល។

ក្នុងដំណើរការពិនិត្យនេះ លោកអភិបាលខេត្តបានឃើញថា ដីផ្នែកខាងក្រោយសាលាបឋមសិក្សា និងអនុវិទ្យាល័យឫស្សីស្រុក បានរងការលិចទឹកទំហំជាង ២ពាន់ម៉ែត្រការ៉េ។ លោកបានស្នើដល់អាជ្ញាធរស្រុកឲ្យយកដីមកចាក់បំពេញ និងប្រើគ្រឿងចក្រឈូសឆាយឲ្យស្អាត ព្រមទាំងកាយរំដោះទឹកចេញពីបរិវេណសាលាឲ្យបានឆាប់រហ័ស។

សម្រាប់ស្ថានភាពព្រែកឫស្សីស្រុក លោកអភិបាលខេត្តបានជំរុញឲ្យមន្ទីរពាក់ព័ន្ធ និងអាជ្ញាធរស្រុកសហការគ្នាចុះធ្វើនិយាមការតាមបណ្ដោយព្រែក និងដាក់គ្រឿងចក្រសម្រាប់កាយ និងស្ដារព្រែកឲ្យបានល្អឡើងវិញ ដើម្បីទុករំដោះទឹកបញ្ជៀសការជនលិច។

លោកអភិបាលខេត្តបានណែនាំថា ការងារទាំងអស់ត្រូវធ្វើឡើងដោយមិនប៉ះពាល់ដល់ប្រជាពលរដ្ឋ និងត្រូវរាយការណ៍ជាប់ជាប្រចាំមកខេត្តដើម្បីជួយដោះស្រាយបញ្ហាឲ្យបានទាន់ពេលវេលា។ លោកបានក្រើនរំលឹកឲ្យមន្ទីរពាក់ព័ន្ធនិងអាជ្ញាធរមូលដ្ឋានបន្តយកចិត្តទុកដាក់លើការងារអន្តរាគមន៍ចំពោះបញ្ហាទឹកលិចនេះ។

ការចុះពិនិត្យនេះបង្ហាញពីការយកចិត្តទុកដាក់របស់អាជ្ញាធរខេត្តក្នុងការដោះស្រាយបញ្ហាទឹកលិចដែលប៉ះពាល់ដល់ការរស់នៅរបស់ប្រជាពលរដ្ឋ និងការសិក្សារបស់សិស្សានុសិស្សក្នុងតំបន់។