អាវុធហត្ថភ្នំពេញចាប់ក្មេងទំនើង៥នាក់ ក្រោយបង្ហោះម៉ូតូនិងកែច្នៃបំពង់ស៊ីម៊ាំងខុសបច្ចេកទេស

ភ្នំពេញ៖ កម្លាំងអាវុធហត្ថរាជធានីភ្នំពេញបានធ្វើប្រតិបត្តិការឆ្មក់បង្រ្កាបក្មេងទំនើងចំនួន៥នាក់ ក្រោយពីបានបង្ហោះម៉ូតូលើផ្លូវសាធារណៈ និងកែច្នៃបំពង់ស៊ីម៊ាំងម៉ូតូខុសបច្ចេកទេស បង្កឲ្យមានសម្លេងរំខានដល់ប្រជាពលរដ្ឋ។

តាមបទបញ្ជារបស់សម្តេចហ៊ុន ម៉ាណែត នាយករដ្ឋមន្ត្រី ដែលទាមទារឲ្យមានការអនុវត្តវិធានការតឹងរឹងបំផុតទៅលើក្មេងទំនើង កម្លាំងអាវុធហត្ថបានធ្វើការឃាត់ខ្លួននិងអប់រំណែនាំយុវជនទាំងនេះ។

ករណីទី១ កើតឡើងនៅថ្ងៃទី០១ធ្នូ នៅខណ្ឌជ្រោយចង្វារ ដែលកម្លាំងអាវុធហត្ថបានឃាត់ម៉ូតូ៤គ្រឿងដែលបានកែច្នៃបំពង់ស៊ីម៊ាំងខុសលក្ខណៈបច្ចេកទេស។ ម៉ូតូទាំងនេះត្រូវបានដកហូតរក្សាទុកជាបណ្តោះអាសន្ន រង់ចាំឲ្យម្ចាស់មកដោះបំពង់ស៊ីម៊ាំងកែច្នៃចេញ ហើយបំពាក់បំពង់ស៊ីម៊ាំងធម្មតាវិញ។

ករណីទី២ កើតឡើងនៅថ្ងៃទី០២ធ្នូ នៅខណ្ឌសែនសុខ ដែលកម្លាំងអាវុធហត្ថបានចាប់ក្មេងទំនើង២នាក់ដែលតែងធ្វើសកម្មភាពបង្ហោះម៉ូតូលើផ្លូវសាធារណៈ។ ក្មេងទាំងនេះត្រូវបានអប់រំ ធ្វើកិច្ចសន្យា និងម៉ូតូ១គ្រឿងត្រូវបានដកហូតរក្សាទុករយៈពេល៣ខែ។

តាមបទបញ្ជារបស់រដ្ឋាភិបាល ក្មេងទំនើងដែលបង្ហោះម៉ូតូលើផ្លូវសាធារណៈនឹងត្រូវឃាត់ម៉ូតូរក្សាទុក៣ខែសម្រាប់ការប្រព្រឹត្តលើកទីមួយ និង៦ខែប្រសិនបើប្រព្រឹត្តលើកទីពីរ។

ប្រតិបត្តិការនេះគឺជាផ្នែកមួយនៃការពង្រឹងសណ្ដាប់ធ្នាប់សាធារណៈ និងការការពារសុវត្ថិភាពចរាចរណ៍ក្នុងរាជធានីភ្នំពេញ។