By 
នាថ្ងៃទី៥ ខែធ្នូ ឆ្នាំ២០២៥ ធនាគារ វីង និងអគ្គនាយកដ្ឋានគយនិងរដ្ឋាករកម្ពុជា បានចុះហត្ថលេខាលើអនុស្សរណៈនៃការយោគយល់គ្នាស្ដីពីកិច្ចសហការជំរុញការប្រើប្រាស់មុខងារទូទាត់តាមមធ្យោបាយអេឡិចត្រូនិក (e-Payment)។
ក្នុងពិធីដ៏ខ្ពង់ខ្ពស់នេះ អ្នកឧកញ៉ា គិត ម៉េង ប្រធានក្រុមប្រឹក្សាភិបាលធនាគារ វីង និងជាអគ្គនាយកប្រតិបត្តិក្រុមហ៊ុនរ៉ូយ៉ាល់គ្រុប បានប្រកាសផ្តល់ “កម្រិតឥណទាន” រហូតដល់ ២០០ លានដុល្លារអាម៉េរិក ដោយមិនគិតអត្រាការប្រាក់រហូតដល់ ៥ថ្ងៃ ដល់ធុរជនដែលបង់ពន្ធតាមប្រព័ន្ធ e-Payment។
ឯកឧត្ដមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា បានគូសរំលេចពីការខិតខំប្រឹងប្រែងក្នុងការប្រែក្លាយស្ថាប័នគយឱ្យកាន់តែទំនើប និងសម្រួលពាណិជ្ជកម្ម។
មុខងារ e-Payment ត្រូវបានដាក់ឱ្យអនុវត្តចាប់តាំងពីឆ្នាំ២០១៨ មក ហើយបច្ចុប្បន្នមានធនាគារជាដៃគូចំនួន ១០ស្ថាប័ន។ ប្រព័ន្ធនេះអនុញ្ញាតឱ្យធុរជនបង់ពន្ធដោយងាយស្រួល រហ័ស និងមានសុវត្ថិភាពខ្ពស់។
តាមរយៈកិច្ចព្រមព្រៀងនេះ ភាគីទាំងពីរនឹងលើកកម្ពស់កិច្ចសហការក្នុងការជំរុញការប្រើប្រាស់ e-Payment ចែករំលែកចំណេះដឹង និងបង្កើតក្រុមការងារបច្ចេកទេសដើម្បីគាំទ្រប្រព័ន្ធ។
សម្រាប់ព័ត៌មានបន្ថែមអំពី “កម្រិតឥណទាន” សូមទាក់ទងការិយាល័យធនាគារ វីង ឬហ្វេសប៊ុកផ្លូវការរបស់ធនាគារ។
