By ខេត្តតាកែវ៖ នារសៀលថ្ងៃព្រហស្បតិ៍ទី៤ ខែធ្នូ ឆ្នាំ២០២៥ នគរបាលខេត្តតាកែវបានឃាត់ខ្លួនបុរសម្នាក់ដែលបានបង្ហោះខ្លឹមសារជេរប្រមាថប៉ះពាល់កិត្តិយសស្ត្រីម្នាក់នៅក្នុងខេត្តនេះលើបណ្តាញសង្គម Facebook។
ការចាត់វិធានការនេះបានធ្វើឡើងក្រោមការដឹកនាំផ្ទាល់ពីលោក ស ថេត អគ្គស្នងការនគរបាលជាតិ និងលោក វ៉ី សំណាង អភិបាលខេត្តតាកែវ បន្ទាប់ពីមានការប្រតិកម្មខ្លាំងពីសាធារណជន មន្ត្រីរាជការ និងអាជ្ញាធរគ្រប់ថ្នាក់ក្នុងខេត្ត។
បុគ្គលដែលត្រូវបានឃាត់ខ្លួនគឺ មាន សង្ហារ អាយុ២០ឆ្នាំ ជាកម្មកររោងចក្រផលិតកាបូប នៅសង្កាត់ចោមចៅ រាជធានីភ្នំពេញ។ គាត់ត្រូវបានចោទប្រកាន់ពីបទប្រើគណនី Facebook ឈ្មោះ “ស្រី ឡូត” ដើម្បីបង្ហោះខ្លឹមសារមិនសមរម្យប៉ះពាល់ដល់ស្ត្រីម្នាក់។
តាមការស៊ើបអង្កេតដំបូង មូលហេតុនៃការបង្ហោះខ្លឹមសារមិនសមរម្យនេះគឺដោយសារតែជនសង្ស័យខឹងប្រពន្ធរបស់ខ្លួន ដែលបានបំបែកបំបាក់ទំនាក់ទំនងជាមួយសង្សារថ្មីឈ្មោះ អឿន សៀវម៉ី ដែលរស់នៅខេត្តតាកែវ។ ជនសង្ស័យបានព្យាយាមទម្លាក់កំហុសឱ្យប្រពន្ធរបស់ខ្លួន និងសង្សារថ្មីនេះ។
បច្ចុប្បន្ន កម្លាំងនគរបាលបានកសាងសំណុំរឿងពេញលេញ និងបានបញ្ជូនទៅសាលាដំបូងខេត្តតាកែវ ដើម្បីចាត់ការតាមនីតិវិធីច្បាប់។ ការចាត់វិធានការនេះបង្ហាញពីការយកចិត្តទុកដាក់របស់អាជ្ញាធរចំពោះការការពារសិទ្ធិស្ត្រី និងការទប់ស្កាត់ការប្រើប្រាស់បណ្តាញសង្គមដោយមិនសមរម្យ។
