នគរបាលព្រហ្មទណ្ឌបង្ក្រាបក្រុមចាប់បង្ខាំងមនុស្ស៨នាក់ រំដោះជនរងគ្រោះ៦នាក់នៅស្វាយរៀង

កម្លាំងជំនាញនគរបាលព្រហ្មទណ្ឌ និងនគរបាលខេត្តស្វាយរៀង បានបង្ក្រាបក្រុមចាប់បង្ខាំង និងធ្វើទារុណកម្មមនុស្សខុសច្បាប់ចំនួន៨នាក់ និងរំដោះជនរងគ្រោះបាន៦នាក់។

តាមរបាយការណ៍ ក្រុមជនសង្ស័យមានជនជាតិចិន២នាក់ និងជនជាតិមីយ៉ាន់ម៉ា៦នាក់ ខណៈជនរងគ្រោះទាំង៦នាក់ជាជនជាតិចិន។ ការស្រាវជ្រាវបានកំណត់ទីតាំងដែលក្រុមជនសង្ស័យយកជនរងគ្រោះទៅបង្ខាំង និងធ្វើទារុណកម្ម។

ហេតុការណ៍ចាប់ផ្ដើមពីថ្ងៃទី៤ ធ្នូ ២០២៥ ម៉ោង០០:៥៥ នៅផ្លូវជាតិលេខ១ សង្កាត់បាវិត ក្រុងបាវិត។ ជនសង្ស័យចិនបានចាប់បុរសចិនម្នាក់ដាក់ចូលរថយន្ត RANGE ROVER ពណ៌ស ផ្លាកលេខភ្នំពេញ2CD-8488។

ក្រោយការស្រាវជ្រាវ កម្លាំងជំនាញបានឃាត់ខ្លួនក្រុមជនសង្ស័យ រួមទាំងវត្ថុតាង និងប្រគល់ជូននគរបាលខេត្តស្វាយរៀងដើម្បីអនុវត្តនីតិវិធីបន្ត។