By យន្តហោះចម្បាំង F-16 របស់កងទ័ពអាកាសសហរដ្ឋអាមេរិកមួយគ្រឿងបានធ្លាក់និងផ្ទុះឆេះយ៉ាងខ្លាំងនៅរដ្ឋកាលីហ្វ័រញ៉ា កាលពីថ្ងៃពុធទី៣ ខែធ្នូ ឆ្នាំ២០២៥។
ហេតុការណ៍នេះកើតឡើងអំឡុងពេលការហ្វឹកហ្វឺនរបស់អង្គភាពកងកម្លាំងដែនអាកាស Thunderbirds នៅទីលានសមយុទ្ធបាញ់គ្រាប់ពិតក្បែរតំបន់ Trona។ រូបភាពនិងវីដេអូនៃហេតុការណ៍ត្រូវបានចែកចាយយ៉ាងទូលំទូលាយនៅលើបណ្តាញសង្គម។
ពីឡុតបានលោតចុះតាមឆ័ត្រយោងដោយសុវត្ថិភាព នៅឆ្ងាយពីកន្លែងយន្តហោះធ្លាក់។ ការផ្ទុះឆេះបានបញ្ចេញផ្សែងខ្មៅខ្មួលខ្មាញ់ដែលអាចមើលឃើញពីចម្ងាយ។
សំណាងល្អដែលមិនមាននរណាម្នាក់រងរបួសក្នុងហេតុការណ៍នេះទេ។ ក្រុមស៊ើបអង្កេតកំពុងស្វែងរកមូលហេតុពិតប្រាកដនៃការធ្លាក់យន្តហោះ។
នេះមិនមែនជាលើកដំបូងដែលយន្តហោះ F-16 ធ្លាក់អំឡុងពេលហ្វឹកហ្វឺនទេ។ កាលពីឆ្នាំ២០២៤ យន្តហោះប្រភេទដូចគ្នាបានធ្លាក់នៅជិតមូលដ្ឋានទ័ពអាកាស Holloman រដ្ឋ New Mexico ដោយសារបញ្ហាម៉ាស៊ីន។
អត្ថបទ៖ សុខ សុវណ្ណ
