By ភ្នំពេញ – ក្រុមសម្របសម្រួលកម្ពុជា (CLG) បានដឹកនាំក្រុមសង្កេតការណ៍អាស៊ាន (AOT) ចុះពិនិត្យបង្គោលព្រំដែនលេខ៥២-៥៣ នៅខេត្តបាត់ដំបង កាលពីថ្ងៃសុក្រ ទី៥ ធ្នូ ២០២៥។
លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានបញ្ជាក់ថា ការចុះពិនិត្យនេះបានធ្វើឡើងនៅវេលាម៉ោង១៤:៥៤នាទី នៅឃុំកំរៀង និងឃុំបឹងរាំង ស្រុកកំរៀង ខេត្តបាត់ដំបង ទល់មុខខេត្តចន្ទបុរី ប្រទេសថៃ។
អ្នកនាំពាក្យក្រសួងការពារជាតិបានជម្រាបជូនបន្ថែមថា រាជរដ្ឋាភិបាលកម្ពុជាតែងតែប្រកាន់ខ្ជាប់នូវមនសិការវិជ្ជាជីវៈ និងការទទួលខុសត្រូវខ្ពស់បំផុតក្នុងការការពារបូរណភាពទឹកដី និងអធិបតេយ្យជាតិ។
កម្ពុជាបន្តគោរពច្បាប់អន្តរជាតិ គោរពគោលការណ៍ព្រំដែនមិនកែប្រែ និងខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនរវាងឥណ្ឌូចិន-សៀម។
ការចុះពិនិត្យនេះបង្ហាញពីការសហការល្អរវាងកម្ពុជា និងអាស៊ានក្នុងការធានាសន្តិសុខ និងស្ថិរភាពតាមបណ្តោយព្រំដែន។
