By ភ្នំពេញ៖ យុវជនអាយុ១៨ឆ្នាំម្នាក់បានរងរបួសបាក់ជើងខាងឆ្វេង និងរលាត់ចង្កា ក្រោយត្រូវម៉ូតូហុងដាបុកពីចំហៀងពេញទំហឹង នៅពេលកំពុងឆ្លងផ្លូវនៅខណ្ឌពោធិ៍សែនជ័យ។
ហេតុការណ៍នេះបានកើតឡើងនៅវេលាម៉ោង៦:៣៣នាទីយប់ ថ្ងៃទី០៦ ខែធ្នូ ឆ្នាំ២០២៥ នៅផ្លូវជាតិលេខ៣ ភូមិព្រៃព្រីងខាងត្បូង សង្កាត់ចោមចៅទី៣ ខណ្ឌពោធិ៍សែនជ័យ។ ជនរងគ្រោះមានឈ្មោះ យ៉ុង នៃយ៉ា ភេទប្រុស អាយុ១៨ឆ្នាំ មានទីលំនៅនៅភូមិស្លាកែត ឃុំព្រៃតាហ៊ូ ស្រុកស្ទឹងសែន ខេត្តកំពង់ធំ។
តាមប្រភពព័ត៌មានបានឲ្យដឹងថា មុនពេលកើតហេតុ យុវជនរងគ្រោះកំពុងជិះម៉ូតូឆ្លងផ្លូវពីលិចទៅកើត ខណៈដែលបុរសម្នាក់ទៀតជិះម៉ូតូហុងដាឌ្រីម ធ្វើដំណើរតាមបណ្តោយផ្លូវជាតិលេខ៣ ក្នុងទិសដៅពីជើងទៅត្បូង លឿនមិនប្រយ័ត្នក៏ជ្រុលបុកម៉ូតូហុងដា zoomer x ពីចំហៀងពេញទំហឹង។
ក្រោយកើតហេតុ ជនរងគ្រោះត្រូវបានរថយន្តសង្គ្រោះរបស់អង្គភាព៧១១ កងពលតូចលេខ៧០ ដឹកបញ្ជូនទៅមន្ទីរពេទ្យព្រះកុសុមះ ចំណែកម៉ូតូត្រូវបានសមត្ថកិច្ចយកទៅរក្សាទុករងចាំដោះស្រាយពេលក្រោយ។
អ្នកជិះម៉ូតូហុងដាក៏រងរបួសស្រាលដែរ ប៉ុន្តែមិនធ្ងន់ធ្ងរដូចជនរងគ្រោះដែលត្រូវបាក់ជើងម្ខាង។ ហេតុការណ៍នេះបង្ហាញពីគ្រោះថ្នាក់នៃការជិះម៉ូតូលឿន និងការមិនប្រយ័ត្នក្នុងការឆ្លងផ្លូវ។
សមត្ថកិច្ចនៅតែបន្តស៊ើបអង្កេតពីមូលហេតុពិតប្រាកដនៃហេតុការណ៍នេះ និងអាចនឹងចោទប្រកាន់អ្នកបណ្តាលហេតុការណ៍តាមច្បាប់។
ដោយ៖ សុខាសែនជ័យ
