អស្ចារ្យ! កម្ពុជាទទួលទេសចរណ៍អន្តរជាតិជាង ៥.៧ លាននាក់ក្នុង១០ខែ កើនឡើង១៤%

រាជធានីភ្នំពេញ៖ សម្តេចធិបតី ហ៊ុន ម៉ាណែត បានបង្ហាញពីភាពរីកចម្រើនយ៉ាងខ្លាំងនៃវិស័យអាកាសចរណ៍កម្ពុជា ដោយក្នុងរយៈពេល១០ខែដំបូងនៃឆ្នាំ២០២៥ បានទទួលទេសចរណ៍អន្តរជាតិជាង ៥.៧ លាននាក់ កើនឡើង១៤% ធៀបនឹងឆ្នាំ២០២៤។

សម្តេចធិបតីបានធ្វើប្រសាសន៍នៅក្នុងឱកាសទិវាជាតិអាកាសចរណ៍ស៊ីវិលលើកទី១ នាថ្ងៃទី៧ ធ្នូ ២០២៥ ដោយបញ្ជាក់ថា កម្ពុជាបច្ចុប្បន្នមានក្រុមហ៊ុនអាកាសចរណ៍៣៥ក្រុមហ៊ុន តភ្ជាប់ជើងហោះហើរជាមួយ១៦ប្រទេស និង៣៩ទីក្រុង។ ក្នុងនោះមានការតភ្ជាប់ទៅកាន់ប្រទេសឈានមុខ៨ក្នុងតំបន់អាស៊ាន។

ប្រទេសសំខាន់ៗដែលមានការតភ្ជាប់ផ្លូវអាកាសរួមមាន៖ ចិន កូរ៉េខាងត្បូង ហុងកុង តៃវ៉ាន់ ឥណ្ឌា កាតា អេមីរ៉ាតអារ៉ាប់រួម និងជប៉ុន។ ការកើនឡើងនេះបង្ហាញពីការរីកចម្រើនយ៉ាងរហ័សនៃវិស័យទេសចរណ៍កម្ពុជា។

សម្តេចធិបតីបានបន្ថែមថា ក្នុងរយៈពេល៣ឆ្នាំចុងក្រោយនេះ កម្ពុជាបានសម្ពោធដាក់ដំណើរការអាកាសយានដ្ឋានអន្តរជាតិថ្មី៣កន្លែង ក្រោមការវិនិយោគសរុប ៣,៦០០ លានដុល្លារ។ អាកាសយានដ្ឋានទាំងនោះរួមមាន៖ អាកាសយានដ្ឋានអន្តរជាតិសៀមរាបអង្គរ (១,១០០ លានដុល្លារ) អាកាសយានដ្ឋានអន្តរជាតិតារាសាគរ (២០០ លានដុល្លារ) និងអាកាសយានដ្ឋានអន្តរជាតិតេជោ (២,៣០០ លានដុល្លារ)។

ការអភិវឌ្ឍនេះបង្ហាញពីទស្សនវិស័យយូរអង្វែងរបស់រដ្ឋាភិបាលក្នុងការលើកស្ទួយវិស័យទេសចរណ៍ និងបង្កើនការតភ្ជាប់អន្តរជាតិ ដែលនាំមកនូវផលប្រយោជន៍សេដ្ឋកិច្ចយ៉ាងច្រើនសម្រាប់ប្រទេស។