កម្ពុជាសម្រេចដាក់ដំណើរការអាកាសយានដ្ឋានអន្តរជាតិថ្មី៣កន្លែង ក្រោមវិនិយោគ៣.៦០០លានដុល្លារ

(ភ្នំពេញ)៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រី បានបញ្ជាក់ក្នុងឱកាសទិវាជាតិអាកាសចរណ៍ស៊ីវិលថា ក្នុងរយៈពេល៣ឆ្នាំចុងក្រោយ វិស័យអាកាសចរណ៍កម្ពុជាបានសម្រេចដាក់ដំណើរការអាកាសយានដ្ឋានអន្តរជាតិថ្មីចំនួន៣ ក្រោមទឹកប្រាក់វិនិយោគសរុប៣.៦០០លានដុល្លារ។

អាកាសយានដ្ឋានទាំង៣រួមមាន៖ អាកាសយានដ្ឋានអន្តរជាតិសៀមរាបអង្គរ (ប្រភេទ4E) វិនិយោគ១.១០០លានដុល្លារ ដែលសម្ពោធឆ្នាំ២០២៣។ អាកាសយានដ្ឋានអន្តរជាតិតារាសាគរ (ប្រភេទ4D) វិនិយោគ២០០លានដុល្លារ សម្ពោធឆ្នាំ២០២៤។ និងអាកាសយានដ្ឋានអន្តរជាតិតេជោ (ប្រភេទ4F) វិនិយោគ២.៣០០លានដុល្លារ សម្ពោធថ្ងៃទី២០តុលា២០២៥។

សម្តេចបវរធិបតីបានលើកឡើងថា ក្រោមគោលនយោបាយបើកចំហជើងមេឃរបស់សម្តេចតេជោ ហ៊ុន សែន បានជួយពង្រឹងការដឹកជញ្ជូនតាមអាកាស ដែលនាំមកនូវផលប្រយោជន៍ដល់ទេសចរណ៍ ពាណិជ្ជកម្ម និងការផ្សារភ្ជាប់សង្គម។

ក្នុងរយៈពេល១០ខែឆ្នាំ២០២៥ កម្ពុជាមានក្រុមហ៊ុនអាកាសចរណ៍៣៥ក្រុម តភ្ជាប់ជាមួយ១៦ប្រទេស និង៣៩ទីក្រុង។ ចំនួនអ្នកដំណើរតាមអាកាសបានកើនឡើងដល់៥.៧លាននាក់ កើន១៤%ធៀបនឹងឆ្នាំ២០២៤។