By ភ្នំពេញ – កម្ពុជាទទួលបានជោគជ័យក្នុងការទទួលការអនុញ្ញាតពន្យាពេលបោសសម្អាតមីនប្រឆាំងមនុស្សរហូតដល់ឆ្នាំ២០៣០ បន្ទាប់ពីរដ្ឋភាគីអនុសញ្ញាអូតាវ៉ាបានអនុម័តលើសំណើសុំរបស់កម្ពុជាកាលពីថ្ងៃទី១-៥ ធ្នូ ២០២៥ នៅទីក្រុងហ្សឺណែវ ប្រទេសស្វីស។
កិច្ចប្រជុំលើកទី២២នៃរដ្ឋភាគីអនុសញ្ញាហាមប្រាមការប្រើប្រាស់មីនប្រឆាំងមនុស្ស (អនុសញ្ញាអូតាវ៉ា) បានអនុម័តជាផ្លូវការលើសំណើសុំពន្យាពេលលើកទី៣ (២០២៦-២០៣០) របស់កម្ពុជា ដោយកំណត់ថ្ងៃបញ្ចប់ថ្មីនៅថ្ងៃទី៣១ ធ្នូ ២០៣០។
ការសម្រេចចិត្តនេះបង្ហាញពីការទទួលស្គាល់ភាពជាអ្នកដឹកនាំ និងការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការអនុវត្តកាតព្វកិច្ចជារដ្ឋភាគីអនុសញ្ញា។ វាក៏ឆ្លុះបញ្ចាំងពីការជឿទុកចិត្ត និងការគាំទ្របន្តពីប្រទេសជាមិត្ត ដៃគូអភិវឌ្ឍន៍ និងភាគីពាក់ព័ន្ធផងដែរ។
រហូតមកដល់ពេលនេះ កម្ពុជាបានសម្រេចសមិទ្ធផលគួរឱ្យកត់សម្គាល់ ដោយបានបោសសម្អាតផ្ទៃដីជាង ៣,៣០០ គីឡូម៉ែត្រការ៉េ និងកំទេចចោលគ្រាប់មីនជាង ៤ លានគ្រាប់។ សមិទ្ធផលទាំងនេះបានរួមចំណែកធ្វើឱ្យប្រសើរឡើងនូវសុខសុវត្ថិភាពសហគមន៍ និងជីវភាពរស់នៅរបស់ប្រជាជន។
ទោះជាយ៉ាងណា មីននៅតែជាបញ្ហាប្រឈមធ្ងន់ធ្ងរសម្រាប់កម្ពុជា ជាពិសេសនៅតាមតំបន់ព្រំដែនដែលមានមីនច្រើន ផ្លូវពិបាកចូលទៅដល់ និងមានហានិភ័យខ្ពស់។ ការយកឈ្នះលើឧបសគ្គទាំងនេះទាមទារឱ្យមានការខិតខំប្រឹងប្រែងបន្ថែម និងធនធានបន្ថែម។
អាជ្ញាធរកម្ពុជាគ្រប់គ្រងសកម្មភាពកំចាត់មីនបានអំពាវនាវឱ្យប្រទេសជាមិត្ត ដៃគូអភិវឌ្ឍន៍ និងភាគីពាក់ព័ន្ធទាំងអស់បន្តគាំទ្រកម្ពុជាក្នុងការសម្រេចចក្ខុវិស័យ «កម្ពុជាគ្មានមីនឆ្នាំ២០៣០»។
កម្ពុជាសូមថ្លែងអំណរគុណដោយស្មោះជូនប្រទេសម្ចាស់ជំនួយ និងដៃគូទាំងអស់ចំពោះការគាំទ្រ និងការរួមចំណែកដ៏មានតម្លៃនេះ។
