By ភ្នំពេញ៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានបញ្ជាក់នៅព្រឹកថ្ងៃទី៧ ខែធ្នូ ថា រាជធានីភ្នំពេញជាចំណុចចាប់ផ្តើមនៃការអនុវត្តយុទ្ធនាការនិយាយថាទេចំពោះព័ត៌មានក្លែងក្លាយតាមរាជធានីខេត្ត។ យុទ្ធនាការនេះត្រូវបានបើកឱ្យដំណើរការជាផ្លូវការក្នុងខែមេសា ឆ្នាំ២០២៥។
អាជីវករ អ្នកប្រកបរបរសេដ្ឋកិច្ចក្រៅប្រព័ន្ធ សិស្ស និស្សិត អ្នកសារព័ត៌មាន អ្នកបង្កើតមាតិកា ថ្នាក់ដឹកនាំ មន្ត្រីរាជការនៃរដ្ឋបាលរាជធានី មន្ទីរព័ត៌មាន និងអាជ្ញាធរក្នុងរាជធានីភ្នំពេញ បានចូលរួមក្នុងការផ្សព្វផ្សាយជាសាធារណៈ។ សកម្មភាពផ្សព្វផ្សាយត្រូវបានធ្វើឡើងតាមរយៈកិច្ចប្រជុំ ការចុះជួបតាមផ្សារ សាលរៀន និងទីសាធារណៈនានាក្នុងរាជធានី។
ពិសេសសកម្មភាពផ្សព្វផ្សាយក្នុងព្រឹត្តិការណ៍ Walk Street នៅរៀងរាល់សប្តាហ៍ ដោយមានការគាំទ្រ និងចូលរួមពីសំណាក់អាជ្ញាធរ មន្ត្រីមន្ទីរព័ត៌មាន និងមន្ទីរវប្បធម៌។ សកម្មភាពទាំងនេះបានទទួលការគាំទ្រពីសាធារណៈជន ដែលបានថ្លែងអំណរគុណចំពោះក្រសួងព័ត៌មាន។
រដ្ឋមន្ត្រីក្រសួងព័ត៌មានបន្តថា យុទ្ធនាការនិយាយថាទេចំពោះព័ត៌មានក្លែងក្លាយបានអនុវត្តតាមបណ្តារាជធានីខេត្តចំនួន១៧ ហើយបច្ចុប្បន្នយុទ្ធនាការនេះបានធ្វើដំណើរដល់ខេត្តមណ្ឌលគិរី រតនគិរី និងត្បូងឃ្មុំ។ ខណៈយុទ្ធនាការផ្សព្វផ្សាយលើបណ្តាញសង្គមបាននិងកំពុងបន្តសកម្ម ដើម្បីផ្តល់ព័ត៌មាន និងខ្លឹមសារបែបអប់រំជូនសាធារណៈជនទូទាំងប្រទេស។
ក្រសួងព័ត៌មានបានផ្តួចផ្តើមរៀបចំយុទ្ធនាការនេះឡើង ដើម្បីលើកកម្ពស់សុវត្ថិភាពព័ត៌មាន និងបង្កើនការយល់ដឹងសាធារណៈអំពីគ្រោះថ្នាក់នៃព័ត៌មានក្លែងក្លាយ។ វិធានការនេះចាំបាច់ក្នុងការកម្ចាត់ព័ត៌មានក្លែងក្លាយចេញពីសង្គមកម្ពុជា សម្រាប់សន្តិសុខព័ត៌មាន និងការអភិវឌ្ឍ។
សកម្មភាពទាំងនេះបានទទួលការគាំទ្រយ៉ាងខ្លាំងពីសាធារណៈជន ដែលចង់ឃើញសង្គមកម្ពុជាមានសុវត្ថិភាពព័ត៌មាន និងប្រកបដោយភាពជឿជាក់ក្នុងការទទួលព័ត៌មាន។
ដោយ៖ សិលា
