រន្ធត់ដល់ហួសគំនិត! ដ្រូនវាយប្រហារសាលាមត្តេយ្យស៊ូដង់ សម្លាប់កុមារតូចៗជាង៣០នាក់

ព្រឹត្តិការណ៍ដ៏រន្ធត់មួយបានកើតឡើងនៅស៊ូដង់ នៅពេលដែលយន្តហោះគ្មានមនុស្សបើក (ដ្រូន) បានវាយប្រហារសាលាមត្តេយ្យមួយ បណ្តាលឱ្យមានអ្នកស្លាប់ជាង៥០នាក់ ក្នុងនោះមានកុមារតូចៗរហូតដល់៣៣នាក់។

តាមការរាយការណ៍របស់ BBC ការវាយប្រហារនេះបានកើតឡើងនៅថ្ងៃសៅរ៍ទី៦ធ្នូ ២០២៥ នៅក្រុង Kalogi ខេត្ត Kordofan ខាងត្បូង។ ដ្រូនបានបាញ់មីស៊ីលចំនួន២គ្រាប់ទៅកាន់សាលាមត្តេយ្យ ដែលជាកន្លែងសុវត្ថិភាពសម្រាប់កុមារតូចៗ។

អង្គការបណ្តាញវេជ្ជបណ្ឌិតស៊ូដង់ (SDN) បានចោទប្រកាន់កងកម្លាំងគាំទ្ររហ័ស (RSF) ថាជាអ្នកបើកការវាយប្រហារនេះ ប៉ុន្តែ RSF មិនទាន់ឆ្លើយតបអ្វីនៅឡើយទេ។

លោក Sheldon Yett អ្នកនាំពាក្យយូនីសេហ្វ បានថ្កោលទោសយ៉ាងខ្លាំងចំពោះព្រឹត្តិការណ៍នេះ៖ «កុមារមិនគួរត្រូវរងគ្រោះដោយសារជម្លោះឡើយ។ ការសម្លាប់កុមារនៅក្នុងសាលារៀនរបស់ពួកគេ គឺជាការរំលោភបំពានដ៏រន្ធត់លើសិទ្ធិកុមារ។»

សង្គ្រាមស៊ីវិលនៅស៊ូដង់ ដែលកំពុងបន្តរវាង RSF និងកងកម្លាំងប្រដាប់អាវុធស៊ូដង់ (SAF) បានឈានដល់កម្រិតអំពើប្រល័យពូជសាសន៍។ តួលេខពីអង្គការសហប្រជាជាតិបង្ហាញថា សង្គ្រាមនេះបានសម្លាប់មនុស្សជាង១៥០,០០០នាក់ និងបង្ខំឱ្យ១៤លាននាក់ផ្លាស់ទីលំនៅ។