ឃាត់ខ្លួនជនសង្ស័យ០៩នាក់ ពាក់ព័ន្ធនឹងការឆបោកតាមប្រព័ន្ធអនឡាញនៅខណ្ឌឫស្សីកែវ

ភ្នំពេញ៖ កម្លាំងសមត្ថកិច្ចចម្រុះបានឃាត់ខ្លួនជនសង្ស័យចំនួន០៩នាក់ក្នុងប្រតិបត្តិការចុះត្រួតពិនិត្យនៅផ្ទះលេខ១៤ ផ្លូវលេខ១៣ ក្នុងបុរីពិភពថ្មី ខណ្ឌឫស្សីកែវ ដោយសង្ស័យពីបទឆបោកតាមប្រព័ន្ធបច្ចេកវិទ្យា (Online Scam)។

គណៈបញ្ជាការឯកភាពរដ្ឋបាលខណ្ឌឫស្សីកែវ និងមន្ត្រីជំនាញអគ្គស្នងការដ្ឋាននគរបាលជាតិ បានដឹកនាំប្រតិបត្តិការនេះនៅថ្ងៃទី០៦ ខែធ្នូ ឆ្នាំ២០២៥ ក្រោមការសម្របសម្រួលពីតំណាងអយ្យការ។ ពួកគេត្រូវបានចោទប្រកាន់ពីការលួចយកព័ត៌មានគណនីធនាគារពីជនរងគ្រោះ និងក្លែងបន្លំឯកសារអត្តសញ្ញាណដើម្បីឆបោកតាមប្រព័ន្ធអនឡាញ។

ក្នុងចំណោមជនសង្ស័យទាំង០៩នាក់ មានជនជាតិកូរ៉េខាងត្បូង០៧នាក់ (ស្ត្រី០២នាក់) និងជនជាតិខ្មែរ០២នាក់ជាអ្នកបើកបររថយន្ត។ សមត្ថកិច្ចបានរឹបអូសសម្ភារៈជាវត្ថុតាងរួមមាន៖ កុំព្យូទ័រយួរដៃ៦គ្រឿង កុំព្យូទ័រ All in one៤គ្រឿង ម៉ូនីទ័រ៦គ្រឿង iPad៨គ្រឿង រួមជាមួយឯកសារក្លែងបន្លំ រូបភាពអីវ៉ាន់ និងខ្លឹមសារអត្ថបទសម្រាប់និយាយឆ្លើយឆ្លង។

បច្ចុប្បន្ន សមត្ថកិច្ចកំពុងសហការជាមួយភាគីពាក់ព័ន្ធក្នុងការស្រាវជ្រាវបន្ថែម ដើម្បីវែកមុខនិងចាត់វិធានការចំពោះមេខ្លោងនៃការឆបោកតាមប្រព័ន្ធបច្ចេកវិទ្យា។ ជនសង្ស័យត្រូវបានប្រគល់ជូនស្នងការដ្ឋាននគរបាលរាជធានីភ្នំពេញ ខណៈទីតាំងសង្ស័យត្រូវបានបិទបណ្តោះអាសន្ន។ សមត្ថកិច្ចបានបញ្ជាក់ថានឹងចាត់វិធានការតឹងរឹងបំផុតចំពោះអ្នកពាក់ព័ន្ធនឹងការឆបោកតាមប្រព័ន្ធអនឡាញ។