By កំពង់ស្ពឺ – លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការសមាគមកាយឫទ្ធិនារីកម្ពុជា បានអញ្ជើញបើកព្រឹត្តិការណ៍បោះជំរំឆ្នាំ២០២៥ នៅរសៀលថ្ងៃទី៦ ខែធ្នូ ឆ្នាំ២០២៥ នៅលម្ហែគិរីរម្យរីសត ក្នុងឧទ្យានជាតិព្រះសុរាម្រិត-កុសុម-គិរីរម្យ។
កម្មវិធីនេះដំណើរការក្រោមប្រធានបទ “ស្វែងយល់ខ្លួនឯង ដើម្បីអនាគតខ្លួនឯង” ដែលផ្តោតលើការអប់រំបែបចលត និងការអភិវឌ្ឍជំនាញជីវិតសម្រាប់កុមារី និងយុវតីកម្ពុជា។
លោកជំទាវបណ្ឌិត ពេជ ចន្ទមុន្នី បានពន្យល់ថា៖ “ការបោះជំរំនេះផ្តល់ការអប់រំដល់កុមារ និងយុវតី នូវចំណេះដឹងដែលមិនបានរៀននៅសាលា ដោយផ្តោតលើការអនុវត្តជាក់ស្តែង ការទទួលខុសត្រូវ និងការដោះស្រាយបញ្ហា។”
កម្មវិធីរយៈពេល៣ថ្ងៃនេះ រួមមានសកម្មភាពច្រើនប្រភេទដូចជា៖ លំហាត់ប្រាណ យោហ្កា សមាធិ ការដើរព្រៃ កម្មវិធី Free Being Me សកម្មភាពចម្អិនអាហារ និងការសម្អាតបរិស្ថាន។
យុវតីពីសាខាខេត្តសៀមរាប បានចែករំលែកថា៖ “យើងរំពឹងទុកនឹងទទួលបានបទពិសោធន៍ និងចំណេះដឹងថ្មីៗ ហើយកម្មវិធីនេះពិតជាលើកទឹកចិត្តយើងឱ្យក្លាហាន និងរឹងមាំជាងមុន។”
លោកស្រី ឆូវ ផល្លី អគ្គស្នងការរងសមាគមកាយឫទ្ធិនារីកម្ពុជា បានបញ្ជាក់ថា ព្រឹត្តិការណ៍នេះបានទាក់ទាញសមាជិការសកម្មពីគ្រប់ខេត្តទូទាំងប្រទេស ដើម្បីឱកាសស្គាល់គ្នា បង្កើតទំនាក់ទំនង និងចែករំលែកបទពិសោធន៍។
កម្មវិធីនេះក៏ផ្តោតលើការអភិវឌ្ឍជំនាញសង្គម ការងារជាក្រុម ការដោះស្រាយជម្លោះ និងការថែរក្សាបរិស្ថាន ដែលជាចំណុចសំខាន់ក្នុងការលើកកម្ពស់សមត្ថភាពយុវជនកម្ពុជា។
ព្រឹត្តិការណ៍បោះជំរំបានបញ្ចប់ដោយជោគជ័យ ដោយអ្នកចូលរួមទាំងអស់បានទទួលការអប់រំ និងបទពិសោធន៍ដ៏មានតម្លៃ ដែលនឹងជួយពួកគេក្នុងការសាងសង់អនាគតរបស់ខ្លួន។
