By ភ្នំពេញ៖ គ្រោះថ្នាក់ចរាចរណ៍ធ្ងន់ធ្ងរបានកើតឡើងនៅព្រលឹមថ្ងៃទី៧ ខែធ្នូ ឆ្នាំ២០២៥ នៅសង្កាត់គោករការ ខណ្ឌព្រកព្នៅ កាលពីម៉ោង៣:៣០នាទី នៅពេលដែលរថយន្តធន់ធំដឹកទំនិញបុកផ្ទប់ពីក្រោយរថយន្តដឹកកញ្ចក់ដែលឈប់ចតនៅលើចិញ្ចើមផ្លូវ។
តាមប្រភពព័ត៌មានពីកន្លែងកើតហេតុបានឲ្យដឹងថា រថយន្តដឹកកញ្ចក់ផ្លាកលេខភ្នំពេញ 3C-3798 បានចតចោលនៅលើចិញ្ចើមផ្លូវមហាវិថីឈ្នះឈ្នះ ខណះម្ចាស់រថយន្តចេញទៅក្រៅ។ ក្រោយមក រថយន្តធន់ធំផ្លាកលេខកំពង់ចាម 4A-0186 បានបើកបរមកដោយល្បឿនលឿន ហើយបុកផ្ទប់ពីក្រោយរថយន្តដឹកកញ្ចក់នោះ។
ការបុកប៉ះនេះបានរុញទម្លុះចូលផ្ទះប្រជាពលរដ្ឋចំនួន៤ខ្នង ដែលស្ថិតនៅក្បែរផ្លូវ បណ្តាលឲ្យមានការខូចខាតយ៉ាងធ្ងន់ធ្ងរដល់អគារ និងសម្ភារៈជាច្រើន។ ម្ចាស់ផ្ទះម្នាក់បានរងរបួសធ្ងន់ ហើយត្រូវបានដឹកជញ្ជូនទៅសង្គ្រោះបន្ទាន់។
ចំណែកអ្នកបើករថយន្តធន់ធំបានចុះពីរថយន្ត ហើយរត់គេចខ្លួនបាត់ស្រមោល។ ក្រោយកើតហេតុ សមត្ថកិច្ចមូលដ្ឋានបានសហការជាមួយមន្ត្រីជំនាញចរាចរណ៍ ចុះមកធ្វើការស៊ើបអង្កេត និងយករថយន្តទាំងពីរគ្រឿងទៅរក្សាទុកជាបណ្តោះអាសន្ន។
សមត្ថកិច្ចកំពុងធ្វើការស៊ើបអង្កេតពីមូលហេតុនៃគ្រោះថ្នាក់ និងស្វែងរកអ្នកបើករថយន្តដែលរត់គេចខ្លួន។ រថយន្តទាំងពីរត្រូវបានដកទៅរក្សាទុកនៅមូលដ្ឋានសមត្ថកិច្ច រង់ចាំការដោះស្រាយជាមួយម្ចាស់ផ្ទះដែលរងការខូចខាត។
គ្រោះថ្នាក់នេះបានបង្កការភ្ញាក់ផ្អើលដល់ប្រជាពលរដ្ឋក្នុងតំបន់ និងជាការរំលឹកដាស់តឿនពីសុវត្ថិភាពចរាចរណ៍ ជាពិសេសការបើកបរក្នុងល្បឿនលឿន និងការចតរថយន្តនៅលើចិញ្ចើមផ្លូវដែលអាចបង្កគ្រោះថ្នាក់ធ្ងន់ធ្ងរ។
