By ភ្នំពេញ៖ ក្រសួងការពារជាតិកម្ពុជាបានបដិសេធយ៉ាងច្បាស់លាស់នូវព័ត៌មានមិនពិតដែលថៃលើកឡើងអំពីការចល័តរថក្រោះរបស់កម្ពុជានៅតំបន់ព្រំដែន។
លោកស្រី ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានធ្វើសេចក្តីប្រកាសព័ត៌មាននៅថ្ងៃទី៧ ខែធ្នូ ឆ្នាំ២០២៥ ដោយបញ្ជាក់ថា៖ “ក្រសួងការពារជាតិបានកត់សម្គាល់ឃើញព័ត៌មានមិនពិតដែលផេកផ្លូវការរបស់កងទ័ពភូមិភាគទី២ថៃបានចុះផ្សាយ ហើយត្រូវបានបណ្តាញសារព័ត៌មានថៃមួយចំនួនដកស្រង់ជាបន្តបន្ទាប់។”
ក្រសួងការពារជាតិបានធ្វើការបដិសេធចំពោះព័ត៌មាននេះដោយបញ្ជាក់ពីរចំណុចសំខាន់៖
១. ព័ត៌មានដែលថាកម្ពុជាបានចល័តរថក្រោះនៅក្រុងសំរោង ខេត្តឧត្តមានជ័យ គឺជាព័ត៌មានមិនពិតទាំងស្រុង។
២. កងកម្លាំងកម្ពុជាមិនបានធ្វើសកម្មភាពណាមួយដែលរំលោភបំពានលើកិច្ចព្រមព្រៀងបទឈប់បាញ់ និងសេចក្តីថ្លែងការណ៍រួមស្តីពីសន្តិភាពរវាងកម្ពុជា និងថៃឡើយ។
ក្រសួងការពារជាតិបានសង្កត់ធ្ងន់ពីការប្តេជ្ញាចិត្តយ៉ាងម៉ឺងម៉ាត់ក្នុងការគោរព និងអនុវត្តនូវកិច្ចព្រមព្រៀងបទឈប់បាញ់ និងសេចក្តីថ្លែងការណ៍រួមស្តីពីសន្តិភាពរវាងប្រទេសទាំងពីរ។ ក្រសួងក៏បានបញ្ជាក់ពីបំណងប្រាថ្នាក្នុងការបន្តសហការយ៉ាងជិតស្និទ្ធនៅគ្រប់កម្រិត ដើម្បីលើកកម្ពស់សន្តិភាព និងស្ថិរភាពរវាងប្រទេសទាំងពីរ។
សេចក្តីប្រកាសនេះបានចេញផ្សាយក្នុងពេលដែលទំនាក់ទំនងព្រំដែនរវាងកម្ពុជា និងថៃកំពុងមានភាពតានតឹង ដោយក្រសួងការពារជាតិចង់បញ្ជាក់ពីការប្តេជ្ញាចិត្តរបស់កម្ពុជាក្នុងការថែរក្សាសន្តិភាពតាមរយៈផ្លូវការទូត និងកិច្ចសហប្រតិបត្តិការ។
