ម៉ាឡេស៊ីរឹតខ្ចៅសម្លាប់ការទាញយកគ្រីបតូខុសច្បាប់ ក្រោយគេលួចអគ្គិសនីជិត ១,១ ប៊ីលានដុល្លារ

រដ្ឋាភិបាលម៉ាឡេស៊ីបានដាក់ចេញវិធានការតឹងរ៉ឹងក្នុងការបង្ក្រាបសកម្មភាពទាញយកគ្រីបតូខុសច្បាប់ បន្ទាប់ពីរកឃើញការលួចប្រើប្រាស់អគ្គិសនីដ៏ធំធេងដែលធ្វើឱ្យខូចខាតជាង ១,១ ប៊ីលានដុល្លារអាមេរិកក្នុងរយៈពេល ៥ ឆ្នាំកន្លងមក។

ក្រុមហ៊ុនផ្គត់ផ្គង់អគ្គិសនីជាតិ Tenaga Nasional Bhd (TNB) បានរាយការណ៍ថា អគ្គិសនីដែលត្រូវបានគេលួចប្រើប្រាស់សម្រាប់ការទាញយកគ្រីបតូមានតម្លៃជាង ១ ប៊ីលានដុល្លារ។ ការលួចនេះត្រូវបានគេរកឃើញតាមរយៈការស្វែងរកកំដៅមិនប្រក្រតី និងការប្រើប្រាស់ឧបករណ៍ចាប់សញ្ញាដោយដៃ។

ក្រសួងថាមពលម៉ាឡេស៊ីបានបង្ហាញថា ពួកគេបានរកឃើញទីតាំងទាញយកគ្រីបតូខុសច្បាប់ជាង ១៤,០០០ កន្លែង ដែលប្រើប្រាស់ថាមពលដោយគ្មានការទូទាត់។ នៅថ្ងៃទី១៩ វិច្ឆិកា រដ្ឋាភិបាលបានបង្កើតក្រុមការងារពិសេសឆ្លងស្ថាប័នដើម្បីត្រួតពិនិត្យបញ្ហានេះ។

លោក Akmal Nasrullah Mohd Nasir អនុរដ្ឋមន្ត្រីក្រសួងថាមពលបានព្រមានថា៖ «ការអនុញ្ញាតឱ្យសកម្មភាពបែបនេះបន្តកើតមាន លែងត្រឹមតែជាការលួចធម្មតាទៀតហើយ។ វាអាចធ្វើឱ្យប្រព័ន្ធថាមពលជាតិរបស់យើងជួបបញ្ហាធ្ងន់ធ្ងរ»។

គួរកត់សម្គាល់ថា ការទាញយកគ្រីបតូនៅម៉ាឡេស៊ីគឺស្របច្បាប់ ប៉ុន្តែប្រតិបត្តិករត្រូវតែចុះឈ្មោះ និងប្រកាន់ខ្ជាប់នូវបទប្បញ្ញត្តិទាក់ទងនឹងប្រសិទ្ធភាពថាមពល។ ការក្លែងបន្លំម៉ែត្រអគ្គិសនី ឬការតភ្ជាប់ថាមពលដោយខុសច្បាប់ គឺជាការរំលោភលើច្បាប់ផ្គត់ផ្គង់អគ្គិសនី។