ក្រសួងព័ត៌មានអំពាវនាវឲ្យអ្នកសារព័ត៌មាន និងអ្នកប្រើបណ្តាញសង្គម កុំផ្សព្វផ្សាយព័ត៌មានយោធាដែលអាចបង្កគ្រោះថ្នាក់

រាជធានីភ្នំពេញ៖ រដ្ឋមន្ត្រីក្រសួងព័ត៌មាន ឯកឧត្តម នេត្រ ភក្ត្រា បានអំពាវនាវដល់អ្នកសារព័ត៌មាន និងអ្នកប្រើប្រាស់បណ្តាញសង្គមទាំងអស់ កុំផ្សព្វផ្សាយ និងចែករំលែកព័ត៌មានអំពីទីតាំងឈរជើង ការចល័តទ័ព លេណដ្ឋានកងទ័ព ការប្រើប្រាស់គ្រឿងសព្វាវុធ និងព័ត៌មានសម្ងាត់យោធាផ្សេងៗទៀត។

ឯកឧត្តមរដ្ឋមន្ត្រីបានសរសេរលើបណ្តាញសង្គមតេឡេក្រាមនៅថ្ងៃទី៨ ធ្នូ ឆ្នាំ២០២៥ថា ក្រសួងព័ត៌មានសូមណែនាំ និងស្នើសាជាថ្មីដល់បងប្អូនអ្នកសារព័ត៌មាន អ្នកធ្វើសកម្មភាពក្នុងវិស័យព័ត៌មាន និងសោតទស្សន៍ និងអ្នកប្រើប្រាស់បណ្តាញទំនាក់ទំនងសង្គមទាំងអស់ កុំធ្វើការផ្សព្វផ្សាយ និងចែករំលែកព័ត៌មានយោធាដែលអាចធ្វើឱ្យអន្តរាយដល់សន្តិសុខជាតិ និងបង្កគ្រោះថ្នាក់ដល់អ្នកបំពេញបេសកកម្មជូនជាតិ។

ជាមួយគ្នានោះដែរ ឯកឧត្តមរដ្ឋមន្ត្រីក៏សូមបងប្អូនតាមដាន និងទទួលព័ត៌មានពីប្រភពផ្លូវការ ជាពិសេសប្រភពពីអ្នកនាំពាក្យក្រសួងការពារជាតិ ដែលនឹងផ្តល់ព័ត៌មានជាប្រចាំពីការវិវត្តនៃស្ថានការណ៍។

ការអំពាវនាវនេះមានគោលបំណងការពារសន្តិសុខជាតិ និងការពារអ្នកបំពេញការងារជូនជាតិពីគ្រោះថ្នាក់ដែលអាចកើតឡើងពីការផ្សព្វផ្សាយព័ត៌មានយោធាដែលមិនត្រឹមត្រូវ។