ថៃទទួលបានការធានាពីមីយ៉ាន់ម៉ា កុំឲ្យគ្រាប់កាំភ្លើងធ្លាក់ចូលទឹកដីថៃទៀត

រដ្ឋមន្ត្រីការបរទេសថៃ លោក Sihasak Phuangketkeow បានធ្វើដំណើរទៅកាន់ប្រទេសមីយ៉ាន់ម៉ា ដើម្បីស្នើសុំកុំឲ្យកងកម្លាំងយោធាផ្លោងគ្រាប់កាំភ្លើងចូលទឹកដីថៃទៀត បន្ទាប់ពីមានគ្រាប់កាំភ្លើងធ្លាក់ចូលខេត្តតាក់ បណ្តាលឲ្យជនស៊ីវិលរងរបួស។

ក្រសួងការបរទេសថៃ បានប្រកាសនៅថ្ងៃចន្ទទី៨ ខែធ្នូ ឆ្នាំ២០២៥ ថា មីយ៉ាន់ម៉ាបានយល់ព្រមធានាថា ប្រតិបត្តិការយោធាដែលកំពុងបន្តនៅក្បែរព្រំដែនរួមរបស់ពួកគេ មិនបង្កគ្រោះថ្នាក់ដល់ជនស៊ីវិលទៀតទេ។

កិច្ចពិភាក្សានេះកើតឡើងបន្ទាប់ពីគ្រាប់កាំភ្លើងធំពីការប៉ះទង្គិចគ្នានៅស្រុក Myawaddy នៃប្រទេសមីយ៉ាន់ម៉ា បានធ្លាក់ចូលទឹកដីថៃក្នុងប៉ុន្មានសប្តាហ៍ថ្មីៗនេះ បណ្តាលឲ្យជនស៊ីវិលជាច្រើននាក់រងរបួសនៅខេត្ត Tak។

យោងតាមសារព័ត៌មាន The Irrawaddy រដ្ឋមន្ត្រីការបរទេសថៃ លោក Sihasak Phuangketkeow និងមេបញ្ជាការយោធាមីយ៉ាន់ម៉ា ឧត្តមសេនីយ៍ជាន់ខ្ពស់ លោក Min Aung Hlaing បានឈានដល់ការយោគយល់គ្នានេះក្នុងអំឡុងកិច្ចពិភាក្សានៅទីក្រុងណៃពិដោរ កាលពីថ្ងៃអាទិត្យ។

លោក Sihasak ក៏បានជួបជាមួយសមាជិកនៃក្រុមប្រឹក្សារដ្ឋបាលរដ្ឋមីយ៉ាន់ម៉ា (SAC) រួមទាំងអនុរដ្ឋមន្ត្រីក្រសួងមហាផ្ទៃ និងរដ្ឋមន្ត្រីក្រសួងការបរទេសសហភាព លោក Than Swe ដើម្បីពិភាក្សាអំពីសន្តិសុខព្រំដែន ឧក្រិដ្ឋកម្មឆ្លងដែន និងកិច្ចសហប្រតិបត្តិការសេដ្ឋកិច្ចផងដែរ។

យោងតាមសេចក្តីថ្លែងការណ៍ ភាគីទាំងពីរបានសង្កត់ធ្ងន់លើផលប្រយោជន៍រួមរបស់ពួកគេនៅក្នុង «សន្តិភាព និងការអភិវឌ្ឍ» នៅតាមបណ្តោយព្រំដែនថៃ-មីយ៉ាន់ម៉ា។ លោក Sihasak បាននិយាយថា ថៃជឿជាក់ថា ការបោះឆ្នោតរបស់មីយ៉ាន់ម៉ានឹងក្លាយជាផ្នែកមួយនៃដំណើរការផ្លាស់ប្តូរនយោបាយ និង «ដំណើរការសន្តិភាពកាន់តែទូលំទូលាយ»។

កងកម្លាំងថៃគ្រាន់តែឆ្លើយតបដោយការបាញ់ព្រមានប៉ុណ្ណោះ បន្ទាប់ពីមានគ្រាប់កាំភ្លើងធ្លាក់ចូលទឹកដីថៃ។