អគ្គីភ័យឆាបឆេះរោងចក្រសំលៀកបំពាក់នៅកំពង់ស្ពឺ កម្មករនាំគ្នារត់ព្រាត

ខេត្តកំពង់ស្ពឺ – ស្ថានភាពភ័យខ្លាចបានកើតឡើងនៅរោងចក្រសំលៀកបំពាក់យីហោ ហាយ យ៉ុន ហ្គាមិន (Hui Yuan Garment Co.Ltd) នៅក្រុងច្បារមន នៅពេលដែលអគ្គីភ័យបានឆាបឆេះកំទេចក្រណាត់នៅមុខឃ្លាំងរោងចក្រ។

ហេតុការណ៍នេះបានកើតឡើងនៅវេលាម៉ោង ០១:៣៥ រសៀល ថ្ងៃទី៨ ខែធ្នូ ឆ្នាំ២០២៥ នៅក្នុងភូមិស្នោទី១ សង្កាត់រកាធំ ក្រុងច្បារមន។ កម្មករ-កម្មការិនីរាប់រយនាក់បានភ្ញាក់ផ្អើលនិងនាំគ្នារត់ចេញព្រោងព្រាតពីកន្លែងកើតហេតុ។

តាមប្រភពព័ត៌មានបានឱ្យដឹងថា នៅមុនពេលកើតហេតុ កម្មករទាំងអស់បានចូលបំពេញការងារដូចសព្វមួយដង។ ក្រោយមកមានអគ្គីភ័យឆាបឆេះកំទេចក្រណាត់នៅមុខឃ្លាំង បង្កឱ្យមានការភ្ញាក់ផ្អើលយ៉ាងខ្លាំង។ ក្រុមកម្មករបាននាំគ្នាចេញព្រោងព្រាត និងរាយការណ៍ទៅសមត្ថកិច្ចភ្លាម។

សមត្ថកិច្ចខេត្តកំពង់ស្ពឺបានអន្តរាគមន៍យ៉ាងរហ័សដោយប្រើប្រាស់រថយន្តពន្លត់អគ្គីភ័យសរុបចំនួន ៤ គ្រឿង រួមមាន៖ រថយន្តពន្លត់អគ្គីភ័យ ២ គ្រឿង នគរបាលខេត្ត ១ គ្រឿង និងនគរបាលក្រុងច្បារមន ១ គ្រឿង។

ករណីអគ្គីភ័យនេះត្រូវបានពន្លត់ ១០០% នៅវេលាម៉ោង ០២:០៥ រសៀល។ សំណាងល្អដែលករណីនេះមិនបណ្ដាលឱ្យមានគ្រោះថ្នាក់មនុស្ស គ្រាន់តែរងការខូចខាតសម្ភារៈតិចតួចប៉ុណ្ណោះ។

បច្ចុប្បន្ន សមត្ថកិច្ចកំពុងស៊ើបអង្កេតដើម្បីស្វែងរកមូលហេតុពិតប្រាកដនៃការឆាបឆេះនេះ។ ក្រុមគ្រប់គ្រងរោងចក្រក៏កំពុងវាយតម្លៃការខូចខាតសម្ភារៈផងដែរ។

កម្មករទាំងអស់បានត្រឡប់ទៅកាន់លំនៅដ្ឋានដោយសុខសន្តិភាព ហើយរោងចក្រនឹងបើកឡើងវិញនៅពេលដែលមានសុវត្ថិភាពគ្រប់គ្រាន់។