ហ្សេលេនស្គីអះអាងថា អ៊ុយក្រែនមិនបោះបង់ទឹកដីឲ្យរុស្ស៊ីទេ បន្ទាប់ពីជួបមេដឹកនាំអឺរ៉ុបនៅឡុងដ៍

បន្ទាប់ពីកិច្ចពិភាក្សាសំខាន់នៅទីក្រុងឡុងដ៍ជាមួយមេដឹកនាំអឺរ៉ុប ដែលបានសម្តែងការព្រួយបារម្ភអំពីសំណើសន្តិភាពរបស់អាមេរិក លោកប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី បានបញ្ជាក់យ៉ាងច្បាស់ថា អ៊ុយក្រែននឹងមិនបោះបង់ទឹកដីណាមួយរបស់ខ្លួនទៅឲ្យរុស្ស៊ីឡើយ។

យោងតាម Euractiv កាលពីថ្ងៃចន្ទទី៨ ខែធ្នូ ឆ្នាំ២០២៥ លោកហ្សេលេនស្គីបានជួបជាមួយនាយករដ្ឋមន្ត្រីអង់គ្លេសលោក Keir Starmer ប្រធានាធិបតីបារាំងលោក Emmanuel Macron និងនាយករដ្ឋមន្ត្រីអាល្លឺម៉ង់លោក Friedrich Merz។ កិច្ចប្រជុំនេះបានធ្វើឡើងនៅពេលដែលទីក្រុងកៀវកំពុងស្វែងរកការគាំទ្ររួមពីសម្ព័ន្ធមិត្តខាងលិច មុននឹងឈានទៅកិច្ចចរចាបន្ថែមជាមួយវ៉ាស៊ីនតោន និងមូស្គូ។

លោកហ្សេលេនស្គីបានប្រាប់អ្នកសារព័ត៌មានថា៖ «រុស្ស៊ីកំពុងទទូចឲ្យយើងបោះបង់ទឹកដី ប៉ុន្តែយើងមិនចង់ប្រគល់អ្វីទាំងអស់។ អ៊ុយក្រែនគ្មានសិទ្ធិស្របច្បាប់ ឬស្មារតីក្នុងការបោះបង់ទឹកដីរបស់ខ្លួនទេ»។

មេដឹកនាំអឺរ៉ុបបានគាំទ្រគោលជំហរនេះ ដោយលោក Starmer បានធានាថា លោកហ្សេលេនស្គីនឹងមិនត្រូវបានគេដាក់សម្ពាធឲ្យទទួលយកកិច្ចព្រមព្រៀងដែលអំណោយផលខ្លាំងពេកសម្រាប់រុស្ស៊ីឡើយ។ លោកបានសង្កត់ធ្ងន់ថា ការបញ្ឈប់ការប្រយុទ្ធណាមួយ «ត្រូវតែមានភាពយុត្តិធម៌ និងស្ថិតស្ថេរ»។

ចំណែកឯលោក Merz បានលើកឡើងថា លោក«សង្ស័យ»អំពីធាតុផ្សំនៃផែនការរបស់អាមេរិក ដែលក្នុងទម្រង់ដំបូងបានស្នើឲ្យអ៊ុយក្រែនបោះបង់ចោលដីដែលមិនទាន់ត្រូវបានកាន់កាប់ដោយរុស្ស៊ី ជាថ្នូរនឹងការធានាសន្តិសុខ។

លោកហ្សេលេនស្គីបាននិយាយថា អ៊ុយក្រែននៅតែរង់ចាំភាពច្បាស់លាស់អំពីការប្តេជ្ញាចិត្តជាក់លាក់ពីសម្ព័ន្ធមិត្តខាងលិច ក្នុងករណីមានការឈ្លានពានថ្មីពីរុស្ស៊ីនាពេលអនាគត។ លោកបានថ្លែងយ៉ាងខ្លាំងថា៖ «គ្មានសន្តិភាពណាមួយដែលអាចពឹងផ្អែកលើការបោះបង់ទឹកដីរបស់យើងនោះឡើយ»។

កិច្ចប្រជុំនេះបានធ្វើឡើងបន្ទាប់ពីលោកត្រាំបានសម្តែងការខកចិត្ត ដោយថាមេដឹកនាំអ៊ុយក្រែននៅមិនទាន់ព្រមចុះហត្ថលេខាលើសំណើសន្តិភាពដែលមានគោលបំណងបញ្ចប់សង្រ្គាមជិតបួនឆ្នាំមកនេះ។ លោកត្រាំបាននិយាយថា៖ «ខ្ញុំជឿថា រុស្ស៊ីមិនអីទេជាមួយផែនការនេះ ប៉ុន្តែខ្ញុំមិនប្រាកដថា លោកហ្សេលេនស្គីនឹងចូលចិត្តវាឬក៏អត់នោះទេ»។