By ខេត្តព្រៃវែង – ក្រសួងមហាផ្ទៃបានប្រកាសពីការសម្ពោធដាក់ឱ្យដំណើរការជាផ្លូវការនូវច្រកទ្វារព្រំដែនអន្តរជាតិ ម៉ឺនជ័យ (ខេត្តព្រៃវែង)-តឹនណាម (ខេត្តតៃនិញ) នាថ្ងៃទី៨ ខែធ្នូ ឆ្នាំ២០២៥។
ពិធីសម្ពោធដ៏ខ្ពង់ខ្ពស់នេះបានប្រព្រឹត្តទៅក្រោមអធិបតីភាពរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោក ផាម មិញវិញ នាយករដ្ឋមន្ត្រីនៃសាធារណរដ្ឋសង្គមនិយមវៀតណាម។
ពិធីនេះមានការអញ្ជើញចូលរួមពីថ្នាក់ដឹកនាំក្រសួង ស្ថាប័ន ថ្នាក់ដឹកនាំខេត្ត មន្ត្រីរាជការ ពាណិជ្ជករ អាជីវករ និងប្រជាពលរដ្ឋជាច្រើនរូបពីប្រទេសទាំងពីរ។ ពិធីបានប្រព្រឹត្តទៅតាមកម្មវិធីដែលបានគ្រោងទុក ប្រកបដោយបរិយាកាសរីករាយ ស្និទ្ធស្នាល និងអធិកអធម។
ច្រកទ្វារព្រំដែនអន្តរជាតិម៉ឺនជ័យស្ថិតនៅភូមិត្បូងវត្ត ឃុំក្របៅ ស្រុកកំចាយមារ ខេត្តព្រៃវែង ដែលទល់មុខនឹងច្រកទ្វារព្រំដែនអន្តរជាតិតឹនណាម ស្ថិតនៅភូមិតិនណាម ឃុំតាំងប៊ិន ខេត្តតៃនិញ។
ច្រកទ្វារនេះមានចម្ងាយប្រមាណ ៦៥គីឡូម៉ែត្រពីសាលាខេត្តព្រៃវែង និង១៣៧គីឡូម៉ែត្រពីរាជធានីភ្នំពេញ។ អគារ ហេដ្ឋារចនាសម្ព័ន្ធទីស្នាក់ការត្រួតពិនិត្យ និងផ្លូវគមនាគមន៍ត្រូវបានស្ថាបនាឡើងដើម្បីបម្រើសកម្មភាពសេដ្ឋកិច្ច សង្គម ទេសចរណ៍ និងការផ្លាស់ប្តូរពាណិជ្ជកម្ម។
កិច្ចសហការរួមគ្នាក្នុងការរៀបចំពិធីសម្ពោធនេះគឺជាសមិទ្ធផលថ្មីមួយទៀតដ៏មានតម្លៃ ដែលបង្ហាញពីការខិតខំប្រឹងប្រែងរួមគ្នាដើម្បីពង្រឹងទំនាក់ទំនង កិច្ចសហប្រតិបត្តិការ និងការអភិវឌ្ឍនៅតាមបណ្តាខេត្តជាប់ព្រំដែនរវាងប្រទេសទាំងពីរ។
កិច្ចសហប្រតិបត្តិការនេះនឹងនាំមកនូវផលប្រយោជន៍ពិតប្រាកដសម្រាប់ប្រជាជននៃប្រទេសទាំងពីរ ក្នុងវិស័យសេដ្ឋកិច្ច ពាណិជ្ជកម្ម និងទេសចរណ៍។
