By ជប៉ុនបានចេញការព្រមានពីគ្រោះរញ្ជួយដីថ្មីទៀតដែលអាចកើតឡើងនៅថ្ងៃខាងមុខ បន្ទាប់ពីរញ្ជួយដីកម្រិត ៧.៦ រ៉ិចទ័របានវាយប្រហារតំបន់ភាគឦសាននៅយប់ថ្ងៃចន្ទទី៨ ខែធ្នូ ឆ្នាំ២០២៥។ គ្រោះថ្នាក់នេះបណ្តាលឲ្យមនុស្សយ៉ាងហោចណាស់ ៣០ នាក់រងរបួស និងបង្ខំឲ្យមនុស្សជិត ១០០,០០០ នាក់ត្រូវជម្លៀសចេញពីលំនៅដ្ឋាន។
នាយករដ្ឋមន្ត្រីជប៉ុនលោកស្រី Sanae Takaichi បានបញ្ជាក់ថា រញ្ជួយដីដែលកើតឡើងនៅម៉ោង ១១:១៥ យប់ នៅតំបន់ Aomori ជាមួយជម្រៅ ៥០ គីឡូម៉ែត្រ បានបណ្តាលឲ្យមានការរបួសចំនួន ៣០ នាក់។ ក្នុងចំណោមអ្នករបួសទាំងនេះ មានមនុស្សម្នាក់របួសធ្ងន់នៅកោះ Hokkaido។
គ្រោះរញ្ជួយដីនេះក៏បានបង្កការខូចខាតយ៉ាងធ្ងន់ធ្ងរដល់ហេដ្ឋារចនាសម្ព័ន្ធ រួមមាន៖ អគារជាច្រើនខូចខាត ផ្លូវថ្នល់បានបំផ្លាញ ការកាត់ផ្តាច់អគ្គិសនីទៅកាន់តំបន់ជាច្រើន និងអគ្គិភ័យឆាបឆេះផ្ទះសម្បែង។
ជប៉ុនជាប្រទេសដែលតែងជួបគ្រោះរញ្ជួយដីញឹកញាប់ ដោយសារតែទីតាំងភូមិសាស្ត្ររបស់ខ្លួនស្ថិតនៅលើតំបន់ដែលគេស្គាល់ថា «ខ្សែក្រវាត់ភ្នំភ្លើង» (Ring of Fire)។ ក្នុងឆ្នាំ២០១១ រញ្ជួយដីកម្រិត ៩.០ រ៉ិចទ័របានបង្ករលកយក្សស៊ូណាមិ បណ្តាលឲ្យមនុស្ស ១៨,៥០០ នាក់ស្លាប់ និងបណ្តាលឲ្យមានការរលាយនុយក្លេអ៊ែរនៅរោងចក្រ Fukushima។
អាជ្ញាធរជប៉ុនបានចេញសញ្ញាព្រមានរលកយក្សស៊ូណាមិបន្ទាប់ពីរញ្ជួយដី ប៉ុន្តែក្រោយមកបានដកចេញវិញ។ ទោះជាយ៉ាងណាក៏ដោយ ការព្រមានពីរញ្ជួយដីថ្មីទៀតនៅតែមានជាបន្តបន្ទាប់។
