ចាប់បានជនសង្ស័យ ៤នាក់ លួចទូរស័ព្ទថ្លៃៗ ៩ករណី នៅតំបន់ថ្មើរជើង

(រាជធានីភ្នំពេញ)៖ កម្លាំងជំនាញព្រហ្មទណ្ឌរាជធានីភ្នំពេញ បានចាប់ខ្លួនជនសង្ស័យ ៤នាក់ ដែលប្រព្រឹត្តបទល្មើសលួចទូរស័ព្ទដៃថ្លៃៗ ចំនួន ៩ករណី នៅតំបន់ផ្លូវថ្មើរជើង និងតំបន់ជុំវិញ។

ការចាប់ខ្លួននេះបានកើតឡើងក្រោមការដឹកនាំផ្ទាល់ពីលោកឧត្តមសេនីយ៍ត្រី ប៊ុន សត្យា និងលោកឧត្តមសេនីយ៍ទោ លី ប៊ុនអេង ដែលបានស្រាវជ្រាវរហូតដល់អាចចាប់ខ្លួនជនសង្ស័យទាំង ៤នាក់បាន។

ករណីលួចទាំង ៩ករណី បានកើតឡើងនៅថ្ងៃទី០៧ ខែធ្នូ ឆ្នាំ២០២៥ នៅតំបន់ផ្សេងៗក្នុងសង្កាត់ជ័យជំនះ និងសង្កាត់ផ្សារកណ្តាល១ ខណ្ឌដូនពេញ។ ទូរស័ព្ទដៃដែលត្រូវលួចភាគច្រើនជាម៉ាកអាយហ្វូន រួមមានគំរូ ១៥ ផ្លឹស, ១៦ ផ្លឹស, ១៣ ប្រូម៉េក និងគំរូផ្សេងៗទៀត។

ជនសង្ស័យទាំង ៤នាក់មាន៖
១. យិន សមរ៉ា (ហៅ រ៉ា) អាយុ ២០ឆ្នាំ
២. សាយ សុធាឧត្តម កើតឆ្នាំ១៩៩២
៣. រិទ្ធ មុនីរ័ត្ន កើតឆ្នាំ១៩៩៧
៤. យិន រ៉ូឌី កើតឆ្នាំ១៩៩១

ឯកឧត្តម ឃួង ស្រេង អភិបាលរាជធានីភ្នំពេញ បានផ្តល់ជូនកម្លាំងជំនាញព្រហ្មទណ្ឌនូវថវិកាលើកទឹកចិត្តចំនួន ៤០០ដុល្លារ ដោយសម្ដែងការកោតសរសើរចំពោះការខិតខំប្រឹងប្រែងក្នុងការស្រាវជ្រាវ។

ទូរស័ព្ទដៃចំនួន ៩គ្រឿងដែលត្រូវលួច សមត្ថកិច្ចបានប្រគល់ជូនម្ចាស់វិញហើយ។ បច្ចុប្បន្ន ជនសង្ស័យទាំង ៤នាក់កំពុងត្រូវឃាត់ខ្លួននៅការិយាល័យ ដើម្បីចាត់ការតាមនិតិវិធី៕

ប្រភព៖ ក្រុមការងារព័ត៌មាន និងប្រតិកម្មរហ័ស ស្នងការដ្ឋាននគរបាលរាជធានីភ្នំពេញ