By ខេត្តបន្ទាយមានជ័យ៖ លោកកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានអញ្ជើញចុះពិនិត្យស្ថានភាពជនភៀសសឹកតាមបណ្តាមណ្ឌលសុវត្ថិភាពក្នុងខេត្តបន្ទាយមានជ័យ បន្ទាប់ពីយោធាថៃបើកបាញ់ប្រហារតាមបន្ទាត់ព្រំដែន។
លោកទេសរដ្ឋមន្រ្តីបានឱ្យដឹងថា ការពិនិត្យនេះអនុវត្តតាមអនុសាសន៍ដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ ដើម្បីរៀបចំមណ្ឌលសុវត្ថិភាពឱ្យបានសមស្រប និងផ្គត់ផ្គង់រាល់តម្រូវការចាំបាច់ជូនជនភៀសសឹក។
ក្នុងនោះ លោកទេសរដ្ឋមន្រ្តីបានណែនាំដល់អាជ្ញាធរខេត្តបន្តពិនិត្យ និងពង្រីកទីតាំងមណ្ឌលសុវត្ថិភាពបន្ថែមទៀត ដើម្បីផ្តល់ការស្នាក់នៅបណ្តោះអាសន្ន និងឆ្លើយតបបានទាន់ពេលវេលា ក្នុងករណីស្ថានការណ៍ឈ្លានពានរបស់យោធាថៃនៅតែបន្ត។
យ៉ាងណាមិញ លោកទេសរដ្ឋមន្រ្តីថ្លែងថា មកទល់ពេលនេះ អាជ្ញាធរខេត្តបន្ទាយមានជ័យបានចាត់ចែងក្នុងការផ្តល់សម្ភារៈមួយចំនួនជូនជនភៀសសឹកសម្រាប់ប្រើប្រាស់ជាបណ្តោះអាសន្ន។
រាជរដ្ឋាភិបាល ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី មានគោលជំហរច្បាស់លាស់ក្នុងការការពារអធិបតេយ្យភាពជាតិ ជាពិសេសការពារអាយុជីវិតប្រជាពលរដ្ឋស៊ីវិលស្លូតត្រង់ទោះក្នុងតម្លៃណាក៏ដោយ។ រាជរដ្ឋាភិបាល និងកងកម្លាំងប្រដាប់នៅជាមួយប្រជាពលរដ្ឋជានិច្ច។
ក្នុងនាមគណៈកម្មាធិការជាតិគ្រប់គ្រងគ្រោះមហន្តរាយ លោកទេសរដ្ឋមន្រ្តីបញ្ជាក់ទៀតថា រាជរដ្ឋាភិបាលបានត្រៀមរួចរាល់នូវអំណោយជាស្បៀង ដូចជាអង្ករ និងសម្ភារៈចាច់ជាច្រើនទៀតសម្រាប់ចែកជូនប្រជាពលរដ្ឋជនភៀសសឹកទាំងអស់ដែលបានជម្លៀសទៅមណ្ឌលសុវត្ថិភាព។
លោកទេសរដ្ឋមន្រ្តីបានក្រើនរំលឹកដល់ប្រជាពលរដ្ឋត្រូវស្តាប់ការណែនាំរបស់អាជ្ញាធរ និងត្រូវជឿជាក់លើការដឹកនាំរបស់រាជរដ្ឋាភិបាលកម្ពុជា ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ដែលតែងតែនៅជាមួយប្រជាពលរដ្ឋគ្រប់ដំណាក់កាល និងគ្រប់កាលៈទេសៈ។
