រដ្ឋមន្ត្រីមហាផ្ទៃបញ្ជាអភិបាលខេត្តព្រំដែនថៃចាត់ការពារប្រជាពលរដ្ឋពីការវាយប្រហារយោធាថៃ

រាជធានីភ្នំពេញ៖ រដ្ឋមន្ត្រីក្រសួងមហាផ្ទៃ លោកឧបនាយករដ្ឋមន្ត្រី ស សុខា បានបញ្ជាឱ្យអភិបាលខេត្តព្រំដែនថៃទាំង៧ ចាត់វិធានការបង្ការការពារសុខសុវត្ថិភាពប្រជាពលរដ្ឋ និងអធិបតេយ្យជាតិ ប្រឈមនឹងសកម្មភាពឈ្លានពានពីកងទ័ពថៃ។

យោងតាមលិខិតចុះថ្ងៃទី៩ ខែធ្នូ ឆ្នាំ២០២៥ កងទ័ពថៃបានចាប់ផ្ដើមវាយប្រហារកងទ័ពកម្ពុជាចាប់ពីថ្ងៃទី៧ ធ្នូ ដោយប្រើអាវុធធុនធ្ងន់ យន្តហោះចម្បាំង និងផ្សែងពុល ដែលបណ្ដាលឱ្យមានវិនាសកម្ម អ្នករបួស និងអ្នកស្លាប់ទាំងកម្លាំងប្រដាប់អាវុធ និងជនស៊ីវិល។

ក្រសួងមហាផ្ទៃបានចេញការណែនាំ៩ចំណុចសំខាន់ៗ រួមមាន៖

១. ជម្លៀសប្រជាពលរដ្ឋពីតំបន់ហានិភ័យខ្ពស់ទៅទីជម្រកសុវត្ថិភាព
២. ផ្ដល់គ្រឿងឧបភោគបរិភាគ ថ្នាំសង្កូវ និងសេវាចាំបាច់
៣. អំពាវនាវដៃគូអភិវឌ្ឍន៍ផ្ដល់ជំនួយ
៤. បង្កើនការថែរក្សាសន្តិសុខនៅទីជម្រក
៥. ហាមផ្សព្វផ្សាយរូបភាពកម្លាំងប្រដាប់អាវុធ
៦. រាយការណ៍ប្រចាំថ្ងៃ៣ដង
៧. កត់ត្រាភស្ដុតាងការឈ្លានពាន
៨. ហាមប្រើដ្រូនស៊ីវិល
៩. បង្កើនការផ្សព្វផ្សាយព័ត៌មានពិត

ខេត្តដែលទទួលបញ្ជារួមមាន៖ ព្រះវិហារ ឧត្តរមានជ័យ បន្ទាយមានជ័យ បាត់ដំបង បៃលិន ពោធិ៍សាត់ និងកោះកុង។ សកម្មភាពឈ្លានពានរបស់ថៃបានបំផ្លាញផ្ទះសម្បែង វត្តអារាម ហេដ្ឋារចនាសម្ព័ន្ធស៊ីវិល និងប៉ះពាល់ធ្ងន់ធ្ងរដល់ជីវភាពប្រជាពលរដ្ឋ។

ក្រសួងមហាផ្ទៃបានជំរុញឱ្យមានការផ្សព្វផ្សាយព័ត៌មានពិត និងច្រានចោលព័ត៌មានមិនពិត ពិសេសការឃោសនាញុះញង់ដែលអាចបញ្ឆេះកំហឹង និងការរើសអើងជាតិសាសន៍រវាងប្រជាជាតិទាំងពីរ។

រដ្ឋបាលខេត្តត្រូវរៀបចំក្រុមការងារពិសេសសម្រាប់កត់ត្រាភស្ដុតាងនៃការវាយប្រហារ រួមទាំងរូបថត វីដេអូ និងទីតាំងជាក់លាក់ ដើម្បីប្រមូលភស្ដុតាងពេញលេញនៃការឈ្លានពានរបស់កងទ័ពថៃ។

សកម្មភាពទប់ស្កាត់នេះគឺដើម្បីធានាសុខសុវត្ថិភាពប្រជាពលរដ្ឋ និងការពារអធិបតេយ្យ និងបូរណភាពទឹកដីជាតិកម្ពុជា ក្នុងពេលដែលស្ថានភាពនៅតាមព្រំដែនកំពុងតែតានតឹង។

អត្ថបទសរសេរដោយ៖ អ៊ាង ប៊ុនរិទ្ធ
កែសម្រួលដោយ៖ សារ៉ា ចន្ទ