By ភ្នំពេញ៖ លោក ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញជាអធិបតីក្នុងពិធីសិក្ខាសាលាសង្ខេបលទ្ធផលយុទ្ធនាការ “ទស្សនាកម្ពុជានៅរដូវកាលបៃតង” ឆ្នាំ២០២៥ និងការកំណត់ទិសដៅសម្រាប់ឆ្នាំ២០២៦។
ក្នុងសិក្ខាសាលាដែលមានអ្នកចូលរួមជាង ៣០០នាក់ រួមមានថ្នាក់ដឹកនាំក្រសួងទេសចរណ៍ អាជ្ញាធរខេត្ត-ក្រុង តំណាងវិស័យឯកជន និងអ្នកផលិតមាតិកាទេសចរណ៍ លោករដ្ឋមន្ត្រីបានរំលឹកពីសមិទ្ធផលគួរឱ្យកត់សម្គាល់ក្នុងរដូវបៃតងឆ្នាំ២០២៥។
“ទេសចរក្នុងស្រុកបានធ្វើដំណើរកម្សាន្តរហូតដល់ ៩លាន ៤៦ម៉ឺននាក់ ក្នុងរយៈពេល ៦ខែ (ឧសភា-តុលា) កើនឡើង ៦៤,៧% បើធៀបនឹងឆ្នាំ២០២៤” លោករដ្ឋមន្ត្រីបានបញ្ជាក់។
យុទ្ធនាការនេះមានគោលបំណងសំខាន់ៗ ៣យ៉ាង៖ ទី១) បង្កើនភាពទាក់ទាញទេសចរអន្តរជាតិ ទី២) ជំរុញទេសចរក្នុងស្រុក និងទី៣) ពង្រីកការចែកចាយទេសចរណ៍ ដើម្បីធ្វើឱ្យកម្ពុជាក្លាយជាគោលដៅទេសចរពេញមួយឆ្នាំ។
លោកហួត ហាក់ បានជម្រាបថា៖ “ការផ្លាស់ប្តូរតែឈ្មោះរដូវកាលមិនអាចធានានូវភាពជោគជ័យបានទេ ប្រសិនបើគ្មានផែនការយុទ្ធសាស្ត្រច្បាស់លាស់ ការអនុវត្តត្រឹមត្រូវ និងការតាមដានវាយតម្លៃលទ្ធផល។”
ក្នុងឱកាសនេះ លោករដ្ឋមន្ត្រីក៏បានរំលែកទុក្ខជាមួយយុទ្ធជនពលី និងជនរងគ្រោះនៅតាមព្រំដែនកម្ពុជា-ថៃ ព្រមទាំងថ្លែងអំណរគុណចំពោះកងកម្លាំងប្រដាប់អាវុធដែលកំពុងការពារអធិបតេយ្យភាពជាតិ។
លោកបានបញ្ជាក់ពីការគាំទ្រពេញទំហឹងចំពោះការសម្រេចចិត្តរបស់រាជរដ្ឋាភិបាលក្រោមការដឹកនាំរបស់សម្តេចនាយករដ្ឋមន្ត្រី ហ៊ុន ម៉ាណែត និងសម្តេចអគ្គមហាសេនាបតីតេជោ ហ៊ុន សែន។
សមិទ្ធផលដែលសម្រេចបានបង្ហាញពីកិច្ចសហការល្អរវាងក្រសួងទេសចរណ៍ អាជ្ញាធរពាក់ព័ន្ធ វិស័យឯកជន និងដៃគូអភិវឌ្ឍន៍ ដែលបានចូលរួមយ៉ាងសកម្មក្នុងការអភិវឌ្ឍវិស័យទេសចរណ៍កម្ពុជា។
យុទ្ធនាការនេះបានបង្កើតឱកាសឱ្យប្រជាជនទូទាំងប្រទេសចូលរួមក្នុងការផ្សព្វផ្សាយ និងទាក់ទាញទេសចរ ដើម្បីធ្វើឱ្យកម្ពុជាក្លាយជាគោលដៅទេសចរណ៍ទាក់ទាញ សម្បូរបែប និងពោរពេញដោយស្នាមញញឹម។
សិក្ខាសាលាបានបញ្ចប់ដោយជោគជ័យ ដោយមានការពិភាក្សាយ៉ាងសកម្មអំពីផែនការសម្រាប់ឆ្នាំ២០២៦ ដើម្បីបន្តការអភិវឌ្ឍវិស័យទេសចរណ៍ឱ្យកាន់តែរីកចម្រើន។
ដោយ៖ សិលា
