រដូវត្រជាក់មកដល់! តំបន់ខ្ពង់រាបធ្លាក់ត្រជាក់១៦°C តំបន់វាលទំនាប២០°C ចាប់ពីថ្ងៃទី១១-១២ ធ្នូ

ភ្នំពេញ៖ ក្រសួងធនធានទឹក និងឧតុនិយម បានចេញការព្រមានអំពីស្ថានភាពអាកាសធាតុដែលនឹងកើតឡើងនៅព្រះរាជាណាចក្រកម្ពុជា ចាប់ពីថ្ងៃទី១១ ដល់ថ្ងៃទី១៣ ខែធ្នូ ឆ្នាំ២០២៥នេះ។

ការប្រាប់ដំណឹងនេះបានចេញមកក្រោយពីមានសម្ពាធទាបកើតឡើងនៅសមុទ្រចិនខាងត្បូង ដែលមានឥទ្ធិពលខ្លាំងលើរបបខ្យល់មូសុងឦសាន ដែលកំពុងបក់លើអាងទន្លេមេគង្គ សមុទ្រកម្ពុជា និងតំបន់ជុំវិញ។

អាកាសធាតុនឹងមានការប្រែប្រួលដូចខាងក្រោម៖

១. តំបន់វាលទំនាប៖ សីតុណ្ហភាពនឹងចុះដល់២០°C នៅពេលយប់ និងកើនឡើងដល់២៩°C នៅពេលថ្ងៃ។ ខ្យល់នឹងបក់មកពីទិសឦសាន និងទិសបូព៌ ដោយមានល្បឿនមធ្យម៦ម៉ែត្រក្នុងមួយវិនាទី។ ខេត្តដូចជា បន្ទាយមានជ័យ បាត់ដំបង ពោធិ៍សាត់ កំពង់ឆ្នាំង កំពង់ធំ កំពង់ចាម ត្បូងឃ្មុំ ព្រៃវែង កណ្តាល តាកែវ ស្វាយរៀង និងរាជធានីភ្នំពេញ អាចមានភ្លៀងធ្លាក់ និងខ្យល់កន្ត្រាក់គ្របដណ្តប់លើផ្ទៃដី១០%។ ចំណែកខេត្តសៀមរាប ពុំមានភ្លៀងធ្លាក់ទេ។

២. តំបន់ខ្ពង់រាប៖ នឹងជាតំបន់ត្រជាក់បំផុត ដោយសីតុណ្ហភាពនឹងចុះដល់១៦°C នៅពេលយប់ និងកើនឡើងដល់២៨°C នៅពេលថ្ងៃ។ ខ្យល់នឹងបក់មកពីទិសឦសាន និងទិសបូព៌ ដោយមានល្បឿនមធ្យម៥ម៉ែត្រក្នុងមួយវិនាទី។ ខេត្តដូចជា កំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និងតំបន់ជួរភ្នំក្រវាញ អាចមានភ្លៀងធ្លាក់ និងខ្យល់កន្ត្រាក់គ្របដណ្តប់លើផ្ទៃដី១៥%។

៣. តំបន់មាត់សមុទ្រ៖ សីតុណ្ហភាពនឹងចុះដល់២០°C នៅពេលយប់ និងកើនឡើងដល់៣០°C នៅពេលថ្ងៃ។ ខ្យល់នឹងបក់មកពីទិសឦសាន និងទិសអាគ្នេយ៍ ដោយមានល្បឿនមធ្យម៥ម៉ែត្រក្នុងមួយវិនាទី។ ខេត្តដូចជា កោះកុង ព្រះសីហនុ កំពត កែប និងជួរភ្នំបូកគោ អាចមានភ្លៀងធ្លាក់ និងខ្យល់កន្ត្រាក់គ្របដណ្តប់លើផ្ទៃដី១០%។ រលកសមុទ្រនឹងមានកម្ពស់ពី០,៥០ម៉ែត្រ ដល់១,២៥ម៉ែត្រ។

ក្រសួងធនធានទឹក និងឧតុនិយម បានផ្តល់អនុសាសន៍ដល់ប្រជាពលរដ្ឋឱ្យត្រៀមខ្លួនសម្រាប់អាកាសធាតុត្រជាក់ ជាពិសេសនៅតំបន់ខ្ពង់រាប ដែលសីតុណ្ហភាពនឹងចុះទាបបំផុត។ ប្រជាពលរដ្ឋគួរតែស្លៀកពាក់អាវក្រៅឲ្យបានកក់ក្តៅ និងថែទាំសុខភាពជាពិសេសសម្រាប់កុមារ និងអ្នកចាស់ជរា។