ប្រធានាធិបតីកូរ៉េខាងត្បូងបញ្ជាស៊ើបអង្កេតទំនាក់ទំនងសាសនា-នយោបាយខុសច្បាប់

រាជធានីសេអ៊ូល – ប្រធានាធិបតីកូរ៉េខាងត្បូង លោក Lee Jae-myung បានបញ្ជាឱ្យធ្វើការស៊ើបអង្កេតយ៉ាងតឹងរ៉ឹងលើទំនាក់ទំនងខុសច្បាប់រវាងក្រុមសាសនា និងអ្នកនយោបាយ ដោយមិនគិតពីភាពជាគណបក្សកាន់អំណាច ឬគណបក្សប្រឆាំង។

ការបញ្ជានេះបានមកបន្ទាប់ពីការកាត់ទោសលោកស្រី Han Hak-ja មេដឹកនាំក្រុមសាសនា Unification Church កាលពីសប្តាហ៍មុន ដែលត្រូវបានចោទប្រកាន់ពីបទរំលោភច្បាប់មូលនិធិនយោបាយ។

លោកស្រី Han ត្រូវបានចោទប្រកាន់ថាបានឃុបឃិតជាមួយអតីតមន្ត្រីសាសនាជាន់ខ្ពស់ ដើម្បីផ្តល់មូលនិធិខុសច្បាប់ដល់អ្នកតាក់តែងច្បាប់ជាន់ខ្ពស់នៃគណបក្សប្រឆាំង មុនការបោះឆ្នោតប្រធានាធិបតីឆ្នាំ២០២២។

ប្រព័ន្ធផ្សព្វផ្សាយកូរ៉េខាងត្បូងបានរាយការណ៍ថា អតីតមន្ត្រី Unification Church បានបង្ហាញថា គាត់បានផ្តល់មូលនិធិដល់អ្នកតាក់តែងច្បាប់នៃគណបក្សប្រជាធិបតេយ្យដែលកំពុងកាន់អំណាច។

ទោះជាយ៉ាងណា គណបក្សប្រឆាំងបានរិះគន់ថា ការស៊ើបអង្កេតលើអ្នកតាក់តែងច្បាប់គណបក្សកាន់អំណាចមិនទាន់ត្រូវបានអនុវត្តនៅឡើយទេ។

អត្ថបទ៖ សាង ស្រីល័ក្ខ