By រាជធានីភ្នំពេញ៖ ក្រសួងការពារជាតិកម្ពុជាបានបញ្ជាក់ថា យោធាថៃបានចាប់ផ្តើមបាញ់ប្រហារចូលក្នុងទឹកដីកម្ពុជានៅវេលាម៉ោង០៤:៤០នាទី នៅព្រឹកថ្ងៃទី១១ ខែធ្នូ ឆ្នាំ២០២៥នេះ។
លោកជំទាវ ម៉ាលី សុជាតា អ្នកនាំពាក្យក្រសួងការពារជាតិកម្ពុជា បានផ្តល់ព័ត៌មានថា សកម្មភាពនេះកើតឡើងនៅតាមបន្ទាត់ព្រំដែនកម្ពុជា-ថៃ ក្នុងភូមិសាស្ត្រយោធភូមិភាគទី៤ ខេត្តឧត្តរមានជ័យ។ យោធាថៃបានប្រើកាំភ្លើងធំបាញ់ចូលក្នុងភូមិសាស្ត្រប្រាសាទខ្នាដែលស្ថិតនៅក្នុងដែនអធិបតេយ្យស្របច្បាប់របស់កម្ពុជា។
អ្នកនាំពាក្យក្រសួងការពារជាតិបានបន្តថា កងកម្លាំងកម្ពុជាបាននិងកំពុងប្រយុទ្ធតតាំងជាមួយសត្រូវឈ្លានពានយ៉ាងស្វិតស្វាញ់ និងយ៉ាងរឹងមាំ ក្នុងការបំពេញតួនាទីរបស់ខ្លួន ដើម្បីការពារបូរណភាពទឹកដីរបស់កម្ពុជា។
សកម្មភាពឈ្លានពាននេះបានកើតឡើងនៅពេលយប់យ៉ាងជ្រៅ ដែលបង្ហាញពីការរំលោភបំពានលើអធិបតេយ្យភាពរបស់កម្ពុជា។ ក្រសួងការពារជាតិកំពុងតាមដានស្ថានភាពយ៉ាងជិតស្និទ្ធ និងបានរៀបចំផែនការការពារទឹកដីជាតិយ៉ាងពេញលេញ។
អត្ថបទសរសេរដោយ អ៊ាង ប៊ុនរិទ្ធ
កែសម្រួលដោយ ធីតា
