អាណាចក្រថៃឈ្លានពានយ៉ាងឃោរឃៅ បង្កឱ្យជនស៊ីវិលស្លូតត្រង់១០នាក់ស្លាប់ រួមទាំងទារក១នាក់

(ភ្នំពេញ)៖ សកម្មភាពឈ្លានពានដោយប្រដាប់អាវុធរបស់ថៃបានបង្កឱ្យមានការខូចខាតយ៉ាងធ្ងន់ធ្ងរដល់ជនស៊ីវិលស្លូតត្រង់នៅកម្ពុជា។ ក្រសួងការពារជាតិបានបញ្ជាក់ថា គិតត្រឹមថ្ងៃទី១០ ខែធ្នូ ឆ្នាំ២០២៥ មានជនស៊ីវិលបាត់បង់ជីវិតរហូតដល់១០នាក់ ក្នុងនោះមានទារក១នាក់ និងរងរបួសចំនួន៦០នាក់។

កម្ពុជាបានអំពាវនាវយ៉ាងម៉ឺងម៉ាត់ឱ្យសហគមន៍អន្តរជាតិថ្កោលទោសសកម្មភាពឧក្រិដ្ឋកម្មសង្គ្រាមខុសច្បាប់របស់ថៃ ដោយទាមទារឱ្យថៃទទួលខុសត្រូវទាំងស្រុងចំពោះការរំលោភបំពានដ៏កំរោលនេះ។

រដ្ឋាភិបាលកម្ពុជាបានអំពាវនាវឱ្យថៃបញ្ឈប់រាល់អរិភាពជាបន្ទាន់ ដោយដកកម្លាំងចេញពីដែនអធិបតេយ្យរបស់កម្ពុជា និងចៀសវាងសកម្មភាពឈ្លានពានដែលគំរាមកំហែងដល់សន្តិភាព និងស្ថិរភាពនៅក្នុងតំបន់។

ទន្ទឹមនឹងនេះ កម្ពុជាបានអំពាវនាវឱ្យភាគីថៃងាកមកគោរពកិច្ចព្រមព្រៀងបទឈប់បាញ់ សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាព និងកាតព្វកិច្ចទាំងឡាយនៅក្រោមច្បាប់អន្តរជាតិឱ្យបានម៉ឺងម៉ាត់ ស្មោះត្រង់ និងដោយសុច្ឆន្ទៈពិតប្រាកដ។

ការឈ្លានពាននេះបានបង្កឱ្យមានការព្រួយបារម្ភយ៉ាងខ្លាំងក្នុងសហគមន៍អន្តរជាតិ ដោយជាការរំលោភបំពានយ៉ាងធ្ងន់ធ្ងរលើសិទ្ធិមនុស្ស និងច្បាប់អន្តរជាតិ។